“Hər bir hakim güzəştə, şifahi xəbərdarlığa da yer verməlidi” - RƏŞAD ABDULLAYEV
Birinci divizionda turun mərkəzi qarşılaşması Naxçıvanda baş tutdu.
Football-plus.az xəbər verir ki, "Neftçi-2"ni qəbul edən “Araz Naxçıvan” gərgin mübarizəyə səhnə olan qarşılaşmada rəqibini 3:1 hesabıyla yendi. Bu görüşdə qonaqların üç futbolçusu və baş məşqçisi Rəşad Abdullayev qırmızı vərəqə aldı.
Dünən əlaqə saxladığımız gənc mütəxəssis yaşananlara belə aydınlıq gətirdi:"Qış fasiləsini zirvədə tamamlamaq istəyirdik. Naxçıvana qələbə üçün getmişdik. Oyuna pis qoşulmadıq, qollar vurmaq üçün fürsətlərimiz oldu. Yararlana bilmədik, bir qolumuzu da hakim saymadı. Ümumilikdə gərgin matç keçdi, futbolçularımın çıxışından razı qaldım, hər birini də təbrik etdim. Hər şeydən öncə onu vurğulayım ki, biz çempionatın ən gənc komandası olmaqla yanaşı, intizama da xüsusi yer verən kollektivik. Mən yetirmələrimi təkcə futbolçu yox, şəxsiyyət kimi də yetişdirməkdə maraqlıyam. Həyatda və karyeralarında ilk ciddi addımlarını atırlar. Biz həmişə futbolçularımıza hakimlər və rəqib futbolçularla qarşıdurmaya getməməyi aşılayırıq. Hakimlik haqda çox danışmağı sevən biri olmamışam. Amma "Araz Naxçıvan"la matçda hakim heç bir güzəşt etməyərək çox sərt idarəçilik etdi. Onu qınamıram, amma hər bir hakim güzəştə, şifahi xəbərdarlığa da yer verməlidi. Oyunçularım kobud intizamsızlıqlar etmədi. Sadəcə, təcrübəsizlik üzündən hisslərini cilovlaya bilmədilər və səhvlər etdilər ki, nəticədə qırmızı vərəqə aldılar. Hakim bir qolumuzu saymadı. Rəqib futbolçu ofsaydda olmasına rəğmən, qapımıza 11 metrlik cərimə zərbəsi təyin etdi. Bunlara etiraz etdiyimə görə mənə qırmızı göstərdi".
ABDULLA İSMAYILOĞLU
