MBA-da ardıcıl iki gün oxşar rekord qeydə alındı.

Çərşənbə axşamı “Minnesota” “San-Antonio”nu 149:139 hesabıyla məğlub etdi və mərkəz oyunçusu Karl-Entoni Tauns qələbəyə 60 xal, 17 ribaund ilə töhfə verdi. O bununla da bir oyunda xal sayına görə yeni klub rekordu müəyyənləşdirdi. Maraqlıdı ki, 2018-də - “Atlanta” ilə oyunda qeydə alınan əvvəlki klub rekordu (56 xal) da Taunsa məxsus idi. Tauns cari mövsümdə 60 xal həddinə çatan ilk basketbolçu oldu və onun rekordu cəmi bir gün yaşadı. İş ondadı ki, “Bruklin”in oyun qurucusu Kayri İrvinq də ertəsi gün “Orlando” ilə oyunda 60 xal topladı. Bu da “Nets” üçün yeni klub rekordu oldu. Əvvəlki rekordu (57 xal) 2012-ci il martın 4-də keçirilən “Şarlott” ilə oyunda müdafiəçi Deron Uilyams müəyyənləşdirmişdi.

İrvinqlə bağlı daha bir maraqlı xəbər var. O, martın 13-də keçirilən “Nyu-York”la oyun zamanı paltardəyişmə otağına daxil olduğuna görə klubu 50 min dollar cərimələnib. “Bruklin” sağlamlıq və təhlükəsizlik ilə bağlı protokolu pozub. Komandanın heyətində meydana çıxmasına və paltardəyişmə otağına daxil olmasına yasaq qoyulan ulduz həmin gün yalnız azarkeş statusu ilə kifayətlənməliydi. Xatırladaq ki, peyvənd olunmaqdan boyun qaçırdığına görə Kayri mövsümün əvvəlində oyunlarda və məşqçlərdə iştirakdan məhrum olunub. Basketbolçu hələ peyvənd etdirməyib.

MHL ilə yanaşı, MBA da ötən həftənin ən yaxşı oyunçularının adını açıqlayıb. “Dallas”ın oyun qurucusu Luka Donçiç Qərb konfransında hamını qabaqlayıb. 23 yaşlı sloveniyalının komandası ötən həftə keçirdiyi 4 oyundan üçündə qalib gəlib, ulduz bu oyunlarda orta hesabla 30,5 xal toplayıb, 11 ribaund edib və 6,3 ötürmə verib. Şərq konfransında həftənin ən dəyərli oyunçusu “Burklin”in forvardı Kevin Dürantdı. “Nets” üç oyunun hamısında qələbə qazanıb, 33 yaşlı amerikalının orta göstəriciləri 30,7 xal, 7,7 ribaund və 7,7 ötürmə olub.