Elmar Baxşıyev: “Sanki mənə futbolçular təqdim olunur, geri çevirirəm”
Heyətinin kasad olmasına rəğmən, "Qəbələ" sərgilədiyi oyunla çempionata rəng qatır.
Bölgə təmsilçisi ötən mövsüm 4-cü yeri tutmaqla Konfrans Liqasında çıxış etdi. Komanda cari “futbol ili”ndə vacib xallar itirsə də, avrokuboklar uğrunda mübarizədən qopmayıb. "Qırmızı-qaralar"ın qış fasiləsində heyəti gücləndirib-gücləndirməyəcəyi maraq doğurur. Bunu dəqiqləşdirmək üçün baş məşqçi Elmar Baxşıyevlə əlaqə saxladıq:
"Bəzən “niyə transfer etmirsiz” deyə suallar ünvanlayırlar. Sanki mənə futbolçular təqdim olunur, geri çevirirəm. Çox istərdim ki, daha geniş heyətimiz olsun, mövsüm ərzində ən azı 2 heyətlə çıxış edək. Elə mövqelərimiz var ki, həmin yerə sərəncamımızda cəmi bir futbolçu var. Məsələn, bir müdafiəçimiz cəzalı və ya zədəli olursa, bunun acısını çəkirik. Amma büdcəmiz daha geniş heyətə sahib olmağa imkan vermir. Ona görə də transfer çalışmalarını büdcəyə uyğun aparırıq".
Təcrübəli mütəxəssis qış fasiləsində komandasına Amit Quluzadə, Nurlan Novruzov, Rauf Əliyev və onlar kimi təcrübəli futbolçuların keçidinin mümkün olub-olmadığına da toxundu:
"Azad agent statuslu futbolçuların transferində maraqlıyıq. Adını çəkdiyiniz futbolçuların hər birinə hörmətimiz var, amma onlarla maraqlanmırıq. Büdcə ilə yanaşı, oyun fəlsəfəmizə uyğun futbolçuların axtarışındayıq".
ABDULLA İSMAYILOĞLU
Digər xəbərlər
