Futzal üzrə yüksək liqada çıxış edən “Neftçi” İK-in oyunçusu Namiq Məmmədkərimovun 5-ci tura təsadüf edən “Rekord club”la matçda hakimlərə qarşı təhqiramiz ifadələr işlətdiyinə görə İntizam Komitəsi tərəfindən 10 oyunluq cəzalandığını xəbər vermişdik.

Məsələ ilə bağlı “Futbol+”ə açıqlama verən təcrübəli futzalçı Apellyasiya Arbitraj Tribunalının onun cəzasını azaldacağına ümid etdiyini bildirmişdi. Ancaq bu baş vermədi və Məmmədkərimovun 10 oyunluq cəzası qüvvədə aldı. Bu dəfə onun buna münasibətini öyrənməklə yanaşı, bizi maraqlandıran başqa mövzular ətrafında da söhbətləşdik.

- Hakimə fiziki təzyiq göstərməsən də, ola bilsin, çox ağır formada təhqir etmisən. Məhz bu səbəbdən cəzan qüvvədə saxlanılıb...
- Səhv etmişəm, başa düşürəm. Ancaq orda fiziki təzyiq olmayıb axı. Təhqirə görə 10 oyun cəzalandırmaq da düzgün deyil.

- Bir qədər də başqa mövzulardan danışaq. Təcrübəli futzalçı kimi çempionatın səviyyəsindən razısan? Oyunlarda elə böyük hesablar qeydə alınır ki, sanki parket üzərinə peşəkar yox, məhəllə komandaları çıxıb.
- Məsələ çempionatın səviyyəsində yox, komanda sayının az olmasındadı. Hər mövsüm çempionatda zəif və güclü kollektivlər olub və olacaq. Hər komandanın turnir hədəfi var. Kimlərsə çempionluğa oynayır, kimlərsə ölkə kubokunu qazanmaq istəyir. Əsas narahat edən məsələ, dediyim kimi, komanda sayının az olmasıdı. Belədə mövsüm ərzində az oyun keçirmək məcburiyyətindəsən.

- Yığmanın əsasını çempionatda çıxış edən futzalçılar təşkil etməlidi. Bu gün yüksək liqada mübarizə aparan komandaların çoxunda legionerlər söz sahibidi. Futzalımızın gələcəyi sayılan U-19, ümumiyyətlə, fiasko yaşayır. Ağatahir Əzimovun çalışdırdığı komanda hələ qələbə qazanmayıb. Belə gənclərlə gələcəkdə nəyə ümid etmək olar?
- İradlarınızı qəbul edirəm. Əsasən legionerlərdən qurulan “Araz-Naxçıvan” Çempionlar Liqasının qrup mərhələsində uğursuzluqla üzləşdi. Naxçıvan təmsilçisi köklü komandadı, istəməzdik ki, belə olsun. Açığı, qrup səddini asanlıqla keçəcəklərini gözləyirdik. Bəlkə də yeni oyunçuları çox olduğundan oyunları alınmadı. Bu səbəbdən bəzi legionerlərlə artıq yollar ayrılıb. Çempionata gəlincə, 4 komanda - “Araz-Naxçıvan”, “Baku Fair”, “Neftçi” və “Rekord club” arasında mükafatlar uğrunda mübarizə gedir. 10 belə kollektiv olsa, çempionatımızın səviyyəsi yüksələr, daha maraqlı və gərgin birinciliyə şahidlik edərik. U-19 yeni formalşmış komandadı, inanıram ki, tədricən “artıracaq”. İnkişaf üçün rəqabəti artırmaq lazımdı.

- “Araz-Naxçıvan”ın çıxışına toxunduq. Joze Alesio da Silvanın çalışdırdığı kollektiv artıq ikinci mövsümdü mötəbər turnirin qrup səddində ilişir. Necə düşünürsən, ardıcıl iki il iddialı komanda ilə heç nəyə nail olmayan baş məşqçini postunda saxlamaq nə dərəcədə düzgün qərardı? Heç kimə sirr deyil ki, klub rəhbərliyi bu il qarşıya “dördlər finalı”na yüksəlmək tapşırığı qoymuşdu və bunun üçün lazım olanı etmişdi.
- Açığı, “Araz Naxçıvan”ın qrupdan çətinlik çəkmədən çıxacağını düşünürdüm. Güclü heyət də formalaşdırmışdılar. Uğursuzluqdan sonra Alesionun postunda qalmasına gəlincə, braziliyalı ilə klub rəhbərliyi arasında imzalanan müvailədə hansı şərtlərin olduğunu biz bilmirik. Eşitdiyimə görə, braziliyalı mütəxəssisə son şans verilib. Yığma qarşıdakı dünya çempionatının seçmə mərhələsində istənilən nəticəni qazanmasa, onunla yollar ayrılacaq.

- Bu gün üçün yığmaya rəhbərlik edəcək yerli mütəxəssis var?
- Bu suala cavab vermək bir qədər çətindi. Görünür, hələ yerli məşqçilərə inanmırlar. Bu məsələyə Alesionun gedişindən sonra baxılacaq. Ancaq çox istərdim ki, milli ölkə adına dünya çempionatına vəsiqə qazansın.

- Məncə, sualdan yayındın. Məsələn, Rizvan Fərzəliyev karyerasını başa vurandan sonra yığmada məşqçi kimi işləyə bilməz? Çoxları onu həmin postda görsə də, Fərzəliyev bu gün heç futzalda yoxdu. Səncə, bu karyerasını başa vuran azərbaycanlı futzalçılara hörmətsizlik deyil? Bu gün-sabah səni də eyni aqibətin gözləyəcəyindən qorxmursan?
- Fikrimcə, bir qədər zamana ehtiyac var. İnanıram ki, hazırkı baş məşqçi yığmadan ayrılandan sonra boş qalan posta azərbaycanlı mütəxəssis təyin olunacaq. Artıq bu barədə fikirləşməyin vaxtı çatıb. Ümid edirəm ki, Rizvan da işləyəcək. Başqa tanınmış veteran futzalçılarımız da var ki, bu gün baş məşqçi işləməyə hazırdılar. Onlara da təklif oluna bilər. Hamı indi yığmadan gözəl nəticə gözləyir. Son vaxtlar uğur üçün darıxmışıq. Braziliyalının rəhbərliyi altında komanda neçə vaxtdı ümidləri doğrultmur. Heç olmasa, bu dəfə nəsə edəcəklərinə ümid bəsləyək. Yalnız Alesio gedəndən sonra bu mövzuda fikir mübadiləsi aparmaq olar.

RƏŞAD