10 oyunluq cəzalanan futzalçı Babək Quliyevə səsləndi - ÖZƏL
Futzal üzrə yüksək liqada çıxış edən “Neftçi” İK-in oyunçusu Namiq Məmmədkərimovun 5-ci tura təsadüf edən “Rekord club”la matçda hakimlərə qarşı təhqiramiz ifadələr işlətdiyinə görə İntizam Komitəsi tərəfindən 10 oyunluq cəzalandığını xəbər vermişdik.
Məsələ ilə bağlı “Football-plus.az” saytına açıqlama verən təcrübəli futzalçı Apellyasiya Arbitraj Tribunalının onun cəzasını azaldıcağına ümid etdiyini də bildirmişdi.
Ancaq bu baş vermədi və Məmmədkərimovun 10 oyunluq cəzası qüvvədə aldı.
Namiq bu dəfə “Football-plus.az” saytına açıqlamasında cəzasının qüvvədə qalmasına təəssüfləndiyini bildirməklə yanaşı, Babək Quliyevə səsləndi: “Ötən dəfə də açıqlamamda bildirmişdim ki, qərardan narazıyam. 10 oyun cəzalanmağımla bağlı qərar səhv idi. Fürsətdən istifadə edib saytınız vasitəsi ilə Babək Quliyevə müraciət etmək istəyirəm. Görmədiyi qeydləri protokola yazmasın. Bəli, təcrübəli futzalçı kimi bunu etməməliydim, təhqirə də yol verməməliydim. Ancaq hakim də yanlışlığa yol verdi. Haqsız qərarı ilə məni özümdən çıxardı. Yenə fikrimdə qalıram ki, 10 oyun çox sərt cəza oldu. Açığı, cəzanı endirəcəklərini gözləyirdim. Təəssüf ki, bu addım atılmadı. Artıq 5 oyun geridə qalıb. İndi cəza müddətim başa çatmasını gözləməliyəm. İnşallah, ikinci dövrənin ortalarında geri dönəcəm. Pley-off və kubok qarşılaşmalarında komandama kömək edə biləcəm".
Namiq Məmmədkərimovla geniş müsahibəni “Futbol+”in növbəti sayında oxuya bilərsiz.
RƏŞAD
