“Kəpəz”in mövsümlərarası fasilədə heyətə qatmaq istədiyi, ancaq keçidi alınmayan Juninyo Maranensi yenidən “sarı-göylər”in düşərgəsinə qayıdıb.

Vinger artıq Tərlan Əhmədovun rəhbərliyi altınfda kollektivlə məşqlərə də başlayıb. Onunla ikiillik müqavilə bağlansa da, anlaşma 2023-ün yanvarından qüvvəyə minəcək.

Braziliyalı yarımmüdafiəçinin “Babrunqas”la müqaviləsi var idi. Litva təmsilçisi mövsümlərarası fasilədə müəyyən təzminat qarşılığında 22 yaşlı futbolçunu Azərbaycana buraxmağa razı idi. Ancaq həmin vaxt “sarı-göylər”in rəhbərliyi onun 6 aydan sonra azad agent statusu alacağını nəzərə alıb əlavə xərcə düşmək istəmədi. Odu ki, Juninyo yeni ildən “Kəpəz”in tamhüquqlu futbolçusu olacaq.

Yeri gəlmişkən, kluba yaxın mənbələrdən əldə etdiyimiz bilgiyə görə, qış fasiləsində xorvatiyalı Mario Mustepikanın da Gəncəyə dönəcəyi gözlənilir.
Xatırlayırsızsa, qapıçı bir müddət əvvəl “Kəpəz”in düşərgəsinə təşrif buyursa da, son klubu “Rudeş” transfer vərəqini göndərmədiyindən onu sifariş etmək mümkün olmamışdı. Mənbəmizin sözlərinə inansaq, qolkiper də Maranensi kimi mövsümün ikinci yarısında “Kəpəz”in uğurları üçün çalışacaq.
“Kəpəz”lə bağlı daha bir xəbərə keçid alaq. Komandanın məşqinin bəzi qüvvələr tərəfindən çəkilib rəqiblərə göndərilməsindən şübhələnən Tərlan Əhmədov həftəiçi hazırlıq prosesinin qapalı keçirilməsinə qərar verib. Mütəxəssis bundan sonra həftədə yalnız bir gün açıq məşqin olacağını bildirib ki, azarkeşlər də məhz həmin gün komandanın hazırlığını izləyə biləcək.

RƏŞAD