“Turan Tovuz”la 3-cü turdan təxirə salınan qarşılaşmadan sonra Qurban Qurbanov bütün stadionların ot örtüyünün təbii olmasını istədiyini bildirdi.

Football-plus.az xəbər verir ki, bu məsələ ölkə gündəminə düşdü. Bəziləri Qurban bəyin fikirlərini dəstəklədi, bəziləri isə bəyənmədi.

Ötən cümə Klublar Komitəsinin iclası keçirildi. Orda Ağdam təmsilçisinin direktoru Əmrah Çəlikəl də iştirak edirdi. Görəsən, klub rəsmisi Qurban bəyin bu fikirlərini təklif şəklində irəli sürüb? Məsələni aydınlaşdırmaq üçün Əmrah bəylə əlaqə saxladıq. “Köhlən atlar”ın rəsmisiylə başqa mövzularla bağlı da söhbətləşdik.

- Klublar Komitəsinin noyabrın 11-də keçirilən iclasında siz də iştirak etdiz. Bizə maraqlıdı, iclasda Qurban Qurbanovun süni örtüklə bağlı səsləndirdiyi fikirləri təklif kimi dilə gətirdiz?
- Bu məsələ həmişə danışılır. Lakin bir gündə həll olunan iş deyil. Bilirsiz ki, Şamaxı və Tovuzdakı arenalar yenidi. Məncə, hamı bu arenaların örtüklərinin dəyişdirilməsinin tərəfdarıdı. Amma bu məsələ klubların büdcəsinə bağlıdı. Bizim bununla bağlı hansısa iş görməyimiz mümkün deyil.

- Ağdamda “Qarabağ” üçün tikiləcək stadionla bağlı fikirlərinizi bilmək istərdik. Yəqin doğma şəhərdə klub üçün dövlət tərəfindən belə bir arenanın inşa olunacağı sizi sevindirir.
- Orda həyata keçiriləcək hər bir layihə bizi çox sevindirir. Təbii ki, futbol klubu olduğumuza görə stadionun da dəyəri tam başqadı. Həqiqətən də arenanın tikilməsi bizi çox sevindirir. Hisslərimiz sözlə ifadə ediləsi deyil.

- Bəlkə də bu barədə danışmaq tezdi. Amma “Gent”lə oyunlar barədə düşüncələrin maraqlı olardı. Komanda bu rəqibi keçə bilər?
- Biz həmişə qələbə qazanmağı hədəfləyirik. Ümid edirik ki, bu görüşlərdə də qalib gələrik. İşlərimizi də bu yöndə planlaşdırmışıq. Klub rəhbərliyi komandaya inanır.

- “Sabah”la “Qarabağ”ın oyununda son 5 ilin azarkeş rekordu qeydə alındı. Yəqin premyer-liqada belə bir görüşü izləmək sizə də xoş gəldi...
- Əlbəttə! İnşallah, həm “Qarabağ”ın, həm də başqa komandaların bütün oyunları belə olar. Bizim istəyimiz də məhz budu. Futbol azarkeşlərlə daha gözəldi. Bu oyun insanlara zövq vermək üçün oynanılır.

- Təbii ki, azarkeşləri ən çox maraqlandıran məsələ transferlərlə bağlıdı. Bu yöndə yenilik olacaq?
- İnşallah. Bu yöndə iş gedir. Həmişə demişik ki, bu, baş məşqçimiz Qurban Qurbanovun sərəncamında olan məsələdi. Onun istəklərini həyata keçirməyə hazırıq. Bu haqda öncədən danışmaq istəmirik.

- Noyabrın 20-də dünya çempionatı start götürəcək. Qətərdə keçiriləcək mundialda favoritiniz kimdi?
- Vallah, Türkiyə ilə Azərbaycan yoxdu deyə, öz işimizlə məşğul olacağıq. “Qarabağ”ımızın hazırlığına vaxt ayıracağıq. Dünya çempionatında favoritim yoxdu.

İLKİN SULTANLI