Rişi Sunak Böyük Britaniyanın yeni baş naziri olub.

Srağagün Böyük Britaniya kralı III Karl onu rəsmi şəkildə baş nazir postuna təyin edib. Yeni hökuməti formalaşdırmaq Sunaka tapşırılıb. Kral bir neçə gün əvvəl xanım baş nazir Liz Trassın istefasını qəbul etmişdi.

42 yaşlı siyasətçi “Sauthempton” azarkeşidi. Məsələn, 2020-nin noyabrında, ilk 8 turdan sonra “müqəddəslər” premyer-liqanın turnir cədvəlinə başçılıq edəndə Sunak “tvitter” hesabında zarafatlaşmışdı: “Buna 32 il getdi, ancaq gözləməyə dəyərmiş. Gəlin ümid edək ki, hələ uzun müddət belə qalacaq”.

Avqustda isə Sunak demişdi ki, siyasətçi olmasaydı, “Sauthempton”un baş məşqçisi olmaq istəyərdi: “Uşaq olanda “Ulduz müharibələri”ndə çəkilməyi arzulayırdım, ancaq bəlkə də bu ən yaxşı variant deyil. Mən Sauthemptondanam, futbol vurğunuyam, “Sauthempton”un baş məşqçisi ola bilsəydim, xoşbəxt olardım”.

Böyük Britaniyanın artıq istefa verən baş naziri Liz Trass isə “Norviç” azarkeşi idi.