“Yığmanın “sükanı arxasında” yerli, gənc mütəxəssislər olmalıdı” - Aslan Kərimov
Yığma Millətlər Liqasının son üç oyununda maksimum nəticə göstərdi.
Football-plus.az xəbər verir ki, qrupdan çıxa bilməsək də, mübarizəni 2-ci pillədə tamamladıq. Komandanın oyununda müəyyən inkişaf gözə dəyir. İndi hamını Canni de Byazinin taleyi maraqlandırır. Onunla müqavilənin müddəti oktyabrın 1-də bitir. Görəsən, AFFA italiyalını postunda saxlayacaq, yoxsa başqa əcnəbi gələcək? Ümumiyyətlə, De Byazi ilə əməkdaşlığa son qoyulmalıdımı? Bu suallara aydınlıq gətirmək üçün Aslan Kərimova tribuna verdik:
"Yığma son 2 oyunda yaxşı performans sərgilədi. Futbolçularımızı təbrik edirəm. Baş məşqçi postuna gəlincə, şəxsi fikrim belədi ki, italiyalıyla yollar ayrılacaq. Çünki De Byazinin qarşısına qoyulan tələb qrupdan çıxmaq idi. O, isə işinin öhdəsindən gələ bilmədi. Düşünürəm ki, yığmanın “sükanı arxasında” yerli, gənc mütəxəssislər olmalıdı. Futbolçularımızın dilini, mentallığını anlamaq baxımdan yerli məşqçi amili böyük rol oynayır. Azərbaycan millisinə rəhbərlik edəcək kadrlarımız da var. Qurban Qurbanov, Rəşad Sadıqov, Ayxan Abbasov, Samir Abasov və başqalarının adını çəkə bilərəm. Əminəm ki, onlar millinin “sükanı arxasında” olsalar, bu vaxta kimi gəlib-getmiş əcnəbilərdən daha yaxşı nəticə göstərərlər".
ABDULLA İSMAYILOĞLU
Digər xəbərlər
