Sentyabrın 15-də “Qarabağ” Avropa Liqasının qrup mərhələsində 2-ci oyununu keçirəcək. Qurban Qurbanovun komandası “Tofiq Bəhramov”da “Nant”ı qonaq edəcək. Gəlin, “xoruzlar ölkəsi”nin təmsilçisini yaxından tanıyaq.

1943-cü ildə yaradılan "Nant" gələn il aprelin 21-də 80 yaşını qeyd edəcək.Fransanın köklü klublarından olmasına baxmayaraq, “bülbüllər” tarixində ilk dəfə Avropa Liqasının qrup mərhələsində mübarizə aparacaq.

Bu komanda da "Frayburq" kimi cari avrokubok mövsümünə qrup mərhələsindən başlayıb. Antuan Kombuarenin çalışdırdığı kollektiv bu günə kimi 8 dəfə ölkə çempionu olmaqla yanaşı, ölkə kubokunun 4 qat qalibidi. “Sarı-yaşıllar” ötən mövsüm Liqa 1-də 9-cu yeri tutsa da, Fransa kubokunu qazandığı üçün Avropa Liqasının qrupunda çıxış etmək hüququ qazanıb.

Komanda ev oyunlarını “Bojuar-Lui Fonteno” stadionda keçirir. Arena 37463 azarkeş tutumuna malikdi. Klubun prezidenti Valdemar Kitadı.
“Nant”ın heyətində 10 legioner çıxış edir və 6 futbolçu müxstəlif yığmaların şərəfini qoruyur. Kollektivdə orta yaş həddi 25,5-di.

Məşhur “transfermarkt.com” portalı “sarı-yaşıllar”ı 99,30 milyon avro dəyərləndirib. Komandanın ən bahalı futbolçuları qapıçı Alban Lafon və hücumameyilli yarımmüdafiəçi Lüdovik Blasdı. Portal hər iki futbolçunun transfer dəyərini bu gün üçün 16 milyon avro göstərib. Onu da qeyd edək ki, Lafon Burkina Faso doğumlu olsa da, Fransa vətəndaşlığını daşıyır. Blas isə ikili vətəndaşlığa malikdi. Onun həm Fransa, həm də Monteneqro pasportu var.

Fransa təmsilçisi mövsümlərarası fasilədə heyətini yetərincə gücləndirib. “Bülbüllər”in diqqət çəkən transferləri “Qalatasaray”dan heyətinə qatdığı Mustafa Məhəmməd, “Lans”dan transfer etdiyi İqnatius Qanaqo və “Uotfort”dan dəvət olunan Mauso Sisokodu. Komandanın bu gün üçün ən məhsuldar futbolçusu Moses Simondu. Nigeriyalı sağ cinah yarımmüdafiəçisi mövqeyində çıxış edir. Onun hesabında 3 qol var. Mustafa Məhəmməd isə 2 dəfə rəqibləri məyus edib. Ancaq Mustafa 2 məhsuldar ötürməylə də yadda qalıb. Onun kimi, Evenn Qussan da 2 məhsuldar ötürmənin müəllifidi.

“Bülbüllər”in baş məşqçisi isə Antuan Kombuaredi. 58 yaşlı mütəxəssis ötən il fevralın 11-dən komandanın “sükanı arxasındadı”. Kömbuare komandasını daha çox 4-2-3-1 taktiki düzülüşü ilə meydana çıxarır. Ancaq bəzən dəyişikliklər də etməyi lazım bilir. Fransa çempionatının sentyabrın 11-nə təsadüf edən 7-ci turunda “Nant” “Loryen”in qonağı olub. Meydan sahiblərinin 3:2 hesabı ilə qalib gəkdikləri matçda baş məşqçi 4-3-3 sxeminə üstünlük verib.

Sonda onu da qeyd edək ki, cümə axşamı “Qarabağ”ın qonağı olacaq komanda Liqa 1-də 15-ci pillədə qərarlaşıb. 7 turdan sonra “sarı-yaşıllar”ın hesabında cəmi bir qələbə var. 3 oyunda heç-heçə edən “bübüllər” 3 qarşılaşmada meydanı başıaşağı tərk edib. Komanda rəqib qapılarından 8 top keçirdiyi halda, 11 dəfə məyus olub.

RƏŞAD