Yeni mövsümdə Misli premyer-liqasında 10 komanda mübarizə aparacaq.

2022/23 mövsümü start götürəcək ki, açılış matçı “Dalğa Arena”da baş tutacaq. "Kəpəz" Mərdəkanda "Zirə"ni qəbul edəcək.

Klublarımız təlim-məşq toplanışı çərçivəsində yetərincə yoxlama oyunu keçirdi. Onların yay hazırlığı dönəmində necə yadda qaldığına birgə nəzər yetirək.

“Qarabağ”

Son çempion Avstriyada keçirdiyi hazırlıq çərçivəsində 3 yoldaşlıq oyununda gücünü sınayıb. İyunun 25-də Rumıniya "Botoşani"si ilə baş titan duel ağdamlıların 4:0 hesablı qələbəsi ilə başa çatıb. 29-da Almaniya "Holştayn Kiel"inə qarşı matçda isə qalib müəyyənləşməyib - 2:2. "Qarabağ" eyni gündə son yoxlama oyununu da keçirib. Rumıniya "Universitatya Krayova"sı ilə qarşılaşma da heç-heçə bitib - 1:1. Beləliklə, Qurban Qurbanovun komandası keçirdiyi 3 görüşdə uduzmasa da, cəmi 1 qələbəyə sevinib.

“Neftçi”

Hazırlığı Türkiyənin Bolu bölgəsində keçirən "Neftçi" də 3 yoxlama oyununa çıxıb. "Sakaryaspor"la iyulun 6-da gerçəkləşən qarşılaşma 1:1 hesabı ilə bitib. 11-də "Sivasspor"a məğlub olan (0:1) bakılılar, nəhayət, 14-də "Qaziantep"lə qolsuz bərabərliyə razılaşıb. Göründüyü ki, Laurentsiu Regekampfın komandası Boluda qələbəyə həsrət qalıb.

“Zirə”

Son mövsümü 3-cü pillədə başa vuran "Zirə" də hazırlıq üçün Bolunu seçmişdi. Özü də qəsəbə təmsilçisi orda iki sınaq matçı ilə kifayətlənib. İyunun 29-da Rumıniya "Hermannştad"ına 1:2 yenilən Rəşad Sadıqovun komandası iyulun 6-da "Eyüpspor"un müqavimətini qıra bilməyib - 0:0.

“Qəbələ”

Bölgə təmsilçisi Boludakı təlim-məşq toplanışı çərçivəsində iki yoxlama oyunu keçirib. İlk matç iyulun 5-də superliqa klubu "Qaziantep"ə qarşı baş tutub. Görüş rəqibin 2:1 hesablı qələbəsi ilə başa çatıb. İkinci qarşılaşmada isə "Qəbələ" Rumıniya "Çiksereda"sını eyni hesabla üstələyib.

“Sabah”

Avrokuboklardan kənarda qalan "Sabah" hazırlıq dönəmini 5 yoxlama oyunu ilə başa vurub. Murad Musayevin komandası iyulun 9-da "Sumqayıt"a 1:2 hesabı ilə uduzub. 14-də reallaşan ikinci matçda isə "bayquşlar" “Sıabail”i üstələyib - 3:1. Bununla da Bakı toplanışını başa vuran “Sabah” Bolqarıstana yollanıb. İyulun 20-də İsrail "Hapoel Hadera"sına uduzan (0:1) komandanı 26-da Cənubi Kipr "Akritas Xlorakas"ı da məyus edib - 3:2. Nəhayət, “Sabah” iyulun 30-da Cənubi Kipr "Nea Salamina"sına 1:2 hesabı ilə yenilib. Yəqin 5 oyunun 4-də qeydə alınan məğlubiyyət Murad Musayevə dərs çıxarmaq üçün yetərincə material verib.

“Sumqayıt”

“Gənclik şəhəri” təmsilçisi yoxlama oyunlarına “Sabah” üzərində qələbə (2:1) ilə başlayıb. İyulun 14-də isə növbəti “qurban” "Kəpəz" olub - 3:2. Hazırlığın ikinci mərhələsini Ankaranın Qızılcahamam bölgəsində keçirən “Sumqayıt” burda daha üç oyuna çıxıb. "Bandırmaspor"la iyulun 20-də baş tutan dueldə qalib müəyyənləşməyibsə (2:2), komanda 5 gün sonra "Samsunspor"a 0:2 hesabı ilə uduzub. Aleksey Baqanın yetirmələri iyulun 28-də son İran çempionu "İstiqlal"a da yenilib - 0:1.

“Şamaxı”

Mövsüm başa çatandan sonra bəlli səbəblərdən uzun müddət səssiz qalan "Şamaxı" hazırlığı ölkəmizdə keçirib. Komanda iyulun 15-də "Turan Tovuz"a 0:1 hesabıyla uduzub. Növbəti iki qarşılaşma isə uyğun olaraq 20-si və 26-da gerçəkləşib. "Kəpəz" və U-19 ilə duellər qolsuz bitib.

“Səbail”

Hazırlığa Gürcüstanda yekun vuran "Səbail" səfər ərəfəsində iki yoxlama görüşünə çıxıb. İyulun 10-da "Kəpəz"i 3:1 üstələyən Mahmud Qurbanovun komandası 14-də "Sabah"a eyni hesabla uduzub. Gürcüstanda isə 3 oyun baş tutub. İyulun 22-də Tiflis "Dinamo"su təmsilçimizi 2:0 məğlub edib. 25-də Gürcüstanın digər yüksək liqa təmsilçisi "Qaqra"nı üstələyən (2:1) "dənizçilər" son görüşü "Dila"ya qarşı keçirib. İyulun 29-da reallaşan qarşılaşmada qalib müəyyənləşməyib - 1:1.

“Kəpəz”

Yenidən elitaya qayıdan "Kəpəz" mövsümöncəsi ilk yoxlama oyununu iyulun 10-da "Səbail"ə qarşı keçirib və 1:3 hesabı ilə uduzub. 4 gün sonra "Sumqayıt"a da yenilən (2:3) gəncəlilər, nəhayət, iyulun 20-də "Şamaxı" ilə qolsuz bərabərliyə razılaşıb. İddiasız rəqiblərlə matçlarda qeydə alınan nəticələr Yaşar Vahabzadənin komandasının real durumunun göstəricisidi.

"Turan Tovuz"

Yoxlama oyunlarına "Şamaxı" üzərində minimalhesablı qələbəylə başlayan Tovuz təmsilçisi təlim-məşq toplanışını Gürcüstanda davam etdirib. İyulun 23-də "Merani"ni üstələyən (3:1) Ayxan Abbasovun komandası 27-də Tiflis "Dinamo"suna müqavimət göstərə bilməyib - 0:4. İki gün sonra isə tovuzlular "Qaqra"nı məyus edib (2:1).

Göründüyü kimi, yalnız avrokubok iştirakçıları və “Sabah” hazırlıq dönəmində daha güclü rəqiblərlə üz-üzə gəlib. Qalanları isə əsasən öz aralarındakı və Gürcüstan klubları ilə duellərdə zəif nöqtələrini tapmağa çalışıb. Nəticələr ümumilikdə ürəkaçan olmasa da, yoxlama oyunlarının statusunu da nəzərə almaq lazımdı.

ŞAİR ABDULLA