Tərlan Əhmədov “Neftçi”nin problemlərini sadaladı
Azərbaycan klubları bu gün Konfrans Liqasının cavab görüşlərinə çıxacaqlar.
"Zirə" səfərdə oynayacaq, "Neftçi" və "Qəbələ" isə doğma meydanda rəqiblərini qəbul edəcək. Hər üç klubumuzun, əsasən də "Neftçi"nin şanslarını dəyərləndirmək üçün "ağ-qaralar"ın və millimizin sabiq üzvü Tərlan Əhmədovun fikirlərini öyrəndik. Təcrübəli mütəxəssis öncə “Neftçi” haqda danışdı: "Avrokuboklarda zəngin təcrübəsi olan "Neftçi"nin debütant "Aris"ə məğlubiyyəti çox üzücü oldu. Hətta deyərdim ki, Kiprdə sərgilənən oyun və tablodakı nəticə ilə ölkə futboluna növbəti zərbə vuruldu. Ölkənin köklü klubunun qələbə qazanmaması bir kənara, oyun planı da bərbad idi. Meydanda nə oyun planı, nə taktiki gedişlər, nə də “ev tapşırığı” gözə dəydi. Futbolçular arasında uyğunlaşma probleminin olduğu aşkar gözə çarpırdı. Sanki komanda Konfrans Liqasında matça yox, adi məşqə çıxmışdı. "Neftçi" rəhbərliyinin idarəçiliyindəki problemlər, tez-tez məşqçi dəyişikliyi, uğurlu transferlərin və hamının yumruq kimi bir olmaması sayəsində komanda bu gün adına layiq çıxış etmir. Böyükağa Hacıyevin zirvələrə daşıdığı "Neftçi"dən əsər-əlamət qalmayıb. Hansı ki, rəhmətlik Böyükağa müəllimin səhətində problem yarandığından, köməkçisi kimi komandanı avrokuboka hazırlaşdırmaq mənə tapşırıldı. 41 günə "Neftçi"ni komplektləşdirib qitəmiqyaslı turnirə qoşulduq və yekunda Avroliqanın qrupuna düşməklə Azərbaycan futbolu tarixində ilkə imza atdıq. Həmin illərdə "Neftçi"nin prezidenti olan Sadıq Sadıqov da komandadan dəstəyini əsirgəmir, yerli məşçi korpusuna güvənir, onların arxasında dayanırdı. Ümumiyyətlə, son 32 ildə "ağ-qaralar"ın gəlib-getmiş prezidentləri arasında Sadıq Sadıqov və Ramin Musayev qədər komada ilə iç-içə olan, futbolçulara və yerli məşqçilərə sona qədər güvənən rəhbərlər olmayıb. Həmişə demişəm, yenə təkrar edirəm, Azərbaycanda yerli məşqçilərə qarşı repressiya, soyqrım var. Məşqçilikdə ən böyük uğur qazananımız Qurban Qurbanovdu. Onun da bəxti onda gətirib ki, rəhbəri türkiyəli Abdulbari Gözəldi. Hansısa yerli olsaydı, uğursuzluğa düçar olacaqdı. Türklər həmkarımıza güvəndi, arxasında durdu və nəticə göz qabağındadı. Bu gün "Qarabağ" təkbaşına Azərbaycanın əmsalını artırır. Bizim dönəmimizdəki "Neftçi"nin uğurundan 10 ilə yaxın keçib, klubda prezidentlər, əcnəbi-yerli məşqçilər bir-birini əvəz edib, amma daha da inkişaf etmək əvəzinə geriyə tərəqqi müşahidə olunur. Ümumiyyətlə, Azərbaycanda yerli məşqçiyə özünü doğrultmaq üçün yetərincə vaxt verilmir, onların istəklərinə məhəl qoyulmur. Bunun nəticəsidi ki, "Neftçi", "Şamaxı" kimi klubların rüsvayçılığı göz önündədi. "Neftçi"nin ən böyük problemlərindən biri də rəhbərliyin baş məşqçiyə böyük vədlər verib, sonra buna xilaf çıxmasıdı. Mənlə yanaşı, Samir Abasovun da başına bu gəldi. Rəhbərliyə “səviyyəli legionerlər gətirilməlidi” deyəndə, əvvəlcə "narahat olma, yaxşı olacaq” söyləyirdilər, sonra isə "çox az büdcəmiz var, ona uyğun futbolçu seçin" deyərək, bizi pis vəziyyətdə qoyur və yaxşı nəticələr tələb edirdilər. Hər halda, rəhbərlik Samir Abasovla yolları ayıracaqdısa, qısa zaman çərçivəsində ona layiqli əvəzləyiçi tapmalıydı. "Aris"lə matça bir ay qalmış baş məşçinin adına aydınlıq gəldi. Qısa müddətdə isə komandanı formalaşdırmaq və Konfrans Liqasında oyuna çıxarmaq çox çətindi. Bu, klub rəhbərliyinin növbəti səriştəsizliyidi. Odu ki, "Neftçi" son 10 ildə yaxşı vaxtlarını yaşamır. Amma nə qədər çətin olsa da, inanaq ki, komanda doğma meydanda üstün oyun sərgiləyərək bizi və bütün xalqımızı sevindirəcək”.
Tərlan bəy qalan iki təmsilçimizin şansları haqda isə bunları dedi: “Zirə" gənc komandadı, elə də zəngin avrokubok təcrübəsi yoxdu. Rəqibi də son dərəcə güclüdü. "Qartallar" evdə 0:3 hesabı ilə məğlub olubsa, səfərdə yaxşı nəticə gözləmək absurddu. Hər halda, Rəşad Sadıqov təcrübəli mütəxəssisdi və onu komandada saxlasalar, yaxın gələcəkdə avrokuboklarda daha yaxşı nəticələr qazanacağına əminəm. "Qəbələ"nin də vəziyyəti ürəkaçan deyil. Səfərdə 4 top buraxaraq, mərhələ şansını, demək olar, sıfırlayıb. Bununla belə, evdə yaxşı futbol sərgiləyərək heç-heçə etmək və ya qələbə qazanmaq mümkündü. Hər üç komandamıza cavab görüşündə uğurlar arzulayıram".
ABDULLA İSMAYILOĞLU
