“Turan Tovuz”un azarkeşləri aksiyaya başlayıb - AÇIQLAMA
Dünən sosial şəbəkələrdə "Turan Tovuz" azarkeşlərinin çempionatdakı səfər oyunlarında iştirak etmək üçün ianə topladığı haqda paylaşım rastımıza çıxdı.
Postu paylaşan komandanın azarkeşlər qrupunun öncüllərindən olan Nemət Musayevdi. "Football-plus.az" saytı olaraq onunla əlaqə saxlayıb fikirlərini öyrəndik:"Uzun fasilədən sonra doğma şəhərimizin təmsilçisi güclülər dəstəsinə qayıtdı. Ona görə də bütün oyunlarda komandanın yanında olub, dəstəyimizi əsirgəməməliyik. İanə toplamaq ideyası "Turan Tovuz" azarkeşlər qrupunun ən fəal üzvü Kamal Sakkayev və mən tərəfindən irəli sürüldü. İanənin toplanması tam könüllüdü. 1, 2, 3 manat, kimin nəyə gücü çatırsa, kömək etməyi xahiş etmişik. Tək Tovuz sakinlərinə yox, bütün Qərb zonasında, Rusiyada yaşayan “Turan”sevərlərə də müraciət etmişik. Yığılan vəsait səfər oyunları üçün zəruri olan yanacaq, yemək və başqa xərcləri qarşılamaq üçündü. Azarkeş qrupu olaraq həmişə, 1-ci divizionda çıxış edəndə də komandanı səfər matçlarında yalqız qoymamışıq. Tarixən Tovuz komandasının azarkeşləri öz çılğınlığı və birliyi ilə diqqəti çəkib. Məqsədimiz güclü azarkeş ordusu yaradıb "Turan Tovuz"a dəstək olmaqdı. Komandamız hər şeyin yaxşısına layiqdi. Bunun üçün azarkeş olaraq əlimizdən gələn hər şeyi edəcəyik".
ABDULLA İSMAYILOĞLU
Digər xəbərlər
