Avropa Konfrans Liqasının 2-ci təsnifat mərhələsinin ilk oyununda “Neftçi”ni Kiprdə qəbul edəcək “Aris”in baş məşqçisi Aleksey Şpilevski mətbuat konfransı keçirib.

"Football-plus.az" xəbər verir ki, Belaruslu mütəxəssis əvvəlcə sabah baş tutacaq oyun haqda fikirlərini bölüşüb.

- Oyuna intensiv hazırlaşmışıq. Uşaqlar hazırdı. İnanıram ki, uğurlu çıxış edəcəyik. Bilirik ki, təcrübəli rəqiblə oynayacağıq. Ancaq biz döyüşə hazırıq.

- Heyətdə xeyli dəyişiklik baş tutub. Sabah komandanızdan nə gözləmək olar?

- Bəli, xeyli dəyişikliyə məruz qalmışıq. İnanırıq ki, bu dəyişiklik xeyrimizə işləyəcək. Çox istərdik ki, fanatlarımızı sevindirməyə bacaracaq.

- “Aris”də hansı problemlər mövcuddu?

- Bilmirəm. Zaman göstərəcək. Hesab edirəm ki, komandada yaxşı futbolçular toplaşıb. İnanıram ki, biz daha da inkişaf edəcəyik.

- “Neftçi”ni favorit sayırsınız?

- Əlbəttə, rəqib çox təcrübəlidi. Ancaq bu o demək deyil ki, rəqibdən çəkinirik. Biz var gücümüzlə döyüşəcəyik.

- “Neftçi”dəki məşqçi dəyişikliyindən sonra hansısa oyununu izləyə bilmisiniz?

- Futbol dünyası kiçikdir. Biz rəqibin Türkiyə toplanışında ki oyunlarınddan videolar tapa bilmişik. Dəyişikliklər olub. Biz hazırıq. Deməyəcəm ki, nə kimi dəyişikliklər ediblər, lakin biz bakılılarla matça hazırıq. Az əvvəl dediyim kimi, əsas odur ki, biz ürəkli olaq. Yetirmələrimə də inanıram.

- Qeyd etdiniz ki, rəqib daha təcrübəlidi. Bu, o deməkdi ki, ikinci nömrəylə oynayacaqsınız?

- İndidən kartları açmaq istəməzdim. Ancaq onu deyə bilərəm ki, tam müdafiədən oynasaq, azarkeşlərimiz bizi başa düşməz. Rəqibi hansı zonadan qarşılayacağımızı zaman göstərəcək.

- Komandamızın debütantı Karol Strutski bütün yoxlama oyunlarında ilk yarışa çıxış etsə də, zədələnib və sabah olmayacaq. O, komandamızın əsas heyətinin oyunçusu idi?

- Bizdə bütün matçlarda qarışıq heyət oynayırdı. Əlbəttə, ciddi itkidi, ancaq komandamızda onu əvəzləməyə futbolçu var.