“Benfika”nın ulduzu MY-ni də seçə bilərdi

İngiltərə premyer-liqasında növbəti səs-küylü transfer gerçəkləşdi: Darvin Nunyes “Benfika”dan “Liverpul”a keçdi. Mersisaydlıların haqqını vermək lazımdı – operativ şəkildə, heç bir problem yaratmadan ötən mövsümün ən parlaq oyunçularından birini rənglərinə bağladılar. Afərin! “Mançester Siti”nin Erlinq Holannın şəxsində gücləndiyini nəzərə alsaq, adekvat cavab həyati önəm daşıyırdı. Həm sırf oyun baxımından, həm də nəhəngin imicini qoruması və marketinq baxımından. Görünür, məhz bu üzdən “Liverpul” rəhbərliyi portuqaliyalılarla ticarəti uzatmadı və böyük paradan keçdi – 75 milyon avro + bonuslarla 25 milyon. Niyyət aydındı: pul var, xərcləməyə hazırdılar və növbəti mövsüm də çempionluğu Qvardiolaya vermək istəmirlər. Yeri gəlmişkən, Darvinlə müqavilənin 2028-ci ilə qədər olması gələcək üçün uruqvaylıya necə ümid bəslədiklərini bir daha göstərir.

Obyektiv oyun səbəblərinə gəlincə, Kloppun komandasının sarsılmaz “üçbucağ”ı göz önündə dağılır. Əvvəlcə Firmino əsas heyətin sistemyaradıcı oyunçusu funksiyasından uzaqlaşdı, indi isə Sadyo Mane İngiltərəni tərk edir və “Bavariya”nın düşərgəsinə köçür. Kloppa təcili seneqallıya əvəzedici lazım idi və görünür, “Liverpul” kağız üzərində oyun üslubuna görə ona çox oxşayan futbolçu tapıb. Ancaq uruqvaylının keçidi yalnız bununla məhdudlaşırmı?

Dias – Nunyes – Salah, “Liverpul”un 2022/23 mövsümündəki hücumlarının yeni reallığı. Belə görünür ki, misirli meydandakı mövqeyinə daha çox bağlı oyunçu olacaq, Diasla Nunyes isə daim yerini dəyişəcək. Bu kontekstdə Darvin çox yararlıdı və rolunun öhdəsindən ideal şəkildə gəlməlidi. Axı “Benfika”da da təkcə hücumun mərkəzində yox, cinahda da tez-tez oynayırdı. Nunyes özü də etiraf edir ki, ona oyuna cinahda başlamaq və cərimə meydançasına ötürmələr və ya asmalar üçün şığımaq daha rahatdı. Anri və ya Ronaldo üslubunda. Çox güman, “Liverpul”da oyun məhz belə qurulacaq.

Nunyesin ötən mövsümdəki statistikası adamı valeh edir: uruqvaylı 40 oyunda 32 qol vurub, Çempionlar Liqasında “Ayaks”, “Barselona”, “Bavariya” və “Liverpul” kimi rəqiblərin qapısına yol tapıb. Bu isə daha bir vacib nüansı ortaya çıxarır – Darvin top səviyyəli oyunlarda, güclü rəqiblər önündə əsmir və daim özünü göstərir. Razılaşın ki, premyer-liqanın şərtləri daxilində bu keyfiyyət çox önəmlidi. Ancaq belə nəhəng statistikada həm də əsas qorxu gizlənir – Nunyes qol rekordlarını Portuqaliyadan İngiltərəyə daşıya biləcəkmi? Bir tərəfdən müəyyən azalma təbiidi. Portuqaliya və İngiltərə liqalarını müqayisə etməyə dəyməz. Onu da qeyd etmək lazımdı ki, uruqvaylı “Benfika”dakı ilk mövsümlərində heç də o qədər çox qol vurmurdu, tədricən bu səviyyəyə yüksəldi. Amma möhtəşəm futbolçu olduğuna şübhə etməyə dəyməz. Təsadüfi deyil ki, Luis Suares hələ “Barselona”da olarkən Kataloniya klubunun rəhbərliyinə həmin vaxt “Almeriya”nın heyətində sequndada çıxış edən uruqvaylını nişan verib. Kim-kim, Suares yaxşı hücumçunu ortababdan ayırmaq bacarığına malikdi.

İndi Kloppun qarşısında duran əsas vəzifə Darvini mümkün qədər sürətlə komanda strukturuna və “qırmızılar”ın vizit vərəqinə çevrilən pressinqə öyrəşdirməkdi. Nunyesin mövqeyini nəzərə alsaq, bu ikiqat vacibdi. Firmino, ardından Jota və Mane rəqibə təzyiq göstərməyə başlamağın vaxtını ideal şəkildə anlayırdılar. Nunyesin bunu nə qədər tez öyrənməsi komandaya verəcəyi faydaya da təsir göstərəcək. Qoy hətta bir mövsümdə 30 qol vurmasın. Xatırladığımız kimi, Nabi Keyta da “Liverpul”a möhtəşəm statistikaya malik parlaq oyunçu kimi keçdi, ancaq Kloppun oyun strukturuna heç cür uyğunlaşa bilmədi.

İlk növbədə ona diqqət yetirməliyik ki, Nunyesin yeni çempionatdakı debüt mövsümünü necə qiymətləndirəcəyik? Bu mənada hazırda “Liverpul”da olan çətin oyun strukturunu nəzərə almaq lazımdı. Uruqvaylı Kloppun əsas prinsiplərini mənimsəsə, oyundaşları ilə yüksək səviyyədə anlaşsa, “qara iş”dən çəkinməməklə yanaşı, meydandakı əsas vəzifəsinin öhdəsindən gəlsə, onun uyğunlaşmasını uğurlu saymaq olar. “Liverpul”da elə indi də nəticəni təmin etməyə qadir olan futbolçular var, odu ki, Nunyesin elə ilk mövsümdə bütün məsuliyyət yükünü boynuna götürməsinə dəyməz. Əsas odu ki, Vernerə çevrilməsin.

Yeri gəlmişkən, Nunyesin başqa variantları da var idi. Ədalət naminə həmin variantları da xatırlatmaq lazımdı. Şayiələrə inansaq, “Mançester Yunayted” və şəxsən Ten Haq onu ələ keçirməyi çox istəyirdi. Belədə tərəzinin bir gözünə çox maraqlı məşqçinin rəhbərliyi altında böyük klubda çıxış etmək imkanı qoyulmuşdusa, o biri gözündə də son illərdə idarəçiliklə bağlı başıpozuqluq və aydın inkişaf vektorunun yoxluğu var idi. Enində-sonunda hələ də Ronaldonun gedib-getməyəcəyi aydın deyil, Nunyesin mövqeyi və oyun praktikası isə birbaşa bundan asılı olacaqdı. Belədə onun “Liverpul”un xeyrinə seçim etməsinin səbəbi tam aydındı.

“Çelsi” və “Milan” da Darvinin namizədliyini gözdən keçirirdi, ancaq bu iki klubla bağlı şayiələr yetərincə tez havaya sovruldu. Kristensenlə Rüdigerin gedişindən sonra, həmçinin Alonso ilə Aspilikuetanın mümkün transferləri ilə bağlı artan söhbətlərin fonunda London klubu ilk növbədə müdafiəni gücləndirmək üçün namizədləri gözdən keçirir. Tyaqo Silva vaxtilə hər nə qədər yaxşı olsa da, təkbaşına mövsümü xilas etməyə qadir deyil. “Milan”a gəlincə, bu klub ciddi satış əməliyyatları həyata keçirmədən belə bahalı transferə qol qoya bilməzdi. Odu ki, təvazökar davranıb, Orici və Sanşeş kimi daha real görünən hədəflərə boylandı.

Bütün bunların fonunda “Liverpul” “Benfika”nın ulduzuna ən ciddi iddiaçı kimi önə çıxdı, futbolçuya qarşılıqlı sərfəli anlaşma təklif etdi. Nunyes dövrümüzün ən yaxşı məşqçilərindən birinin rəhbərliyi altında çalışmaq imkanı və oyun praktikası qazanacaq, deməli, həm də “artırmalı” olduğu oyun aspektlərində tərəqqi edəcək. “Liverpul” isə gənc və perspektivli oyunçuya yiyələnib ki, o da Maneni ideal şəkildə əvəz edə və premyer-liqanın ulduzuna çevrilə bilər. Kəsəsi, İngiltərədə növbəti mövsüm də ən azı ötən mövsüm qədər gərgin və “isti” mübarizə vəd edir.

ELZAMİN hazırladı