“Qaradağ Lökbatan”ın hazırlıq planı bəllidi – FÜZULİ MƏMMƏDOV AÇIQLADI
Birinci divizion klubları arasında iddialılardan biri də “Qaradağ Lökbatan”dı.
Ötən mövsüm çempionatı birinci yerdə başa vuran komanda, yəqin ki, növbəti “futbol ili”ndə titulunu qorumağa çalışacaq. Klubun planlarını öyrənmək üçün baş məşqçisi Füzuli Məmmədovla əlaqə saxladıq.
Təcrübəli mütəxəssisin “Football-plus.az” saytına açıqlaması belə oldu: “Hazırda klub istirahətdədi. İyulun 1-dən məşqlərə başlayacağıq. 20 gün Bakıda hazırlaşandan sonra 2 həftəlik təlim-məşq toplanışı baş tutacaq. Əlbəttə, hazırlıq prosesinin harda olacağı klubun büdcəsindən asılıdı. Ölkə xaricində də ola bilər, Azərbaycanda da. Toplanış üçün elə bir tarix müəyyənləşdirmişik ki, başa çatandan sonra çempionata təxminən 1 həftə qalacaq. Təlim-məşq toplanışına kimi 3 yoldaşlıq oyunu keçirəcəyik. Toplanış zamanı isə 3 oyun keçirməyi planlaşdırmışıq. Yəni ümumilikdə 6 oyun. Amma hansı klublarla qarşılaşacağımız hələ dəqiq deyil. Çünki onlar da məşqlərə başlamalıdı. Çox güman, 1-ci divizionda çıxış edən komandalarla oynayacağıq. Premyer-liqa klublarından da təklif edən olsa, oynamağa hazırıq”.
Füzuli Məmmədov heyətlə bağlı detallar haqda da danışdı:“Demək olar ki, təcrübəli oyunçuların hamısı ilə müqavilənin müddəti bitib. Əlbəttə, əksəriyyətinə yeni müqavilə təklif edəcəyik. Çempionatı 1-ci yerdə bitirdiklərinə görə onları göndərmək istəmirik. Yenə də danışıqlar olacaq. Yəqin ki, futbolçular daha yaxşı təklifi dəyərləndirəcək”.
ŞAİR ABDULLA
Digər xəbərlər
