Yeni mövsümə hazırlıqlarını davam etdirən “Qarabağ” heyətini gücləndirmək niyyətindədi.

“Football-plus.az” xəbər verir ki, Ağdam təmsilçisi “Hapoel”in (Təl-Əviv) futbolçusu Marko Yankoviçi transfer etmək istəyir. Bu məlumatı İsrailin “middleeast-24.com” saytı yayıb. Monteneqro millisinin üzvünün 2023-cü ilin iyununa kimi Təl-Əviv klubu ilə müqaviləsi var. Bu səbəbdən “Qarabağ” “Hapoel”ə 125 min, Yankoviçin özünə isə 350 min avro maaş təklif edib.

Qeyd edək ki, 26 yaşlı yarımmüdafiəçi həm hücumun arxasında, həm də cinahlarda vinger kimi oynaya bilir. “Partizan”ın yetirməsi olan futbolçu müxtəlif illərdə “Belqrad”, “Maribor” (Sloveniya), SPAL ,”Krotone” (hər ikisi İtaliya) klublarında çıxış edib. 2021-ci ildə “Beytar Yerusəlim”lə müqavilə bağlayan yarımmüdafiəçi bu komandada bir mövsüm keçirdikdən sonra fevralda “Hapoel Tel Əviv”ə transfer olunub. O, bu mövsüm İsrail çempionatında 11 oyunda meydana çıxıb. Yankoviç Monteneqro millisində 35 oyunda 1 qol vurub.