Sırağagün səhər saatlarında MBA-da final seriyası başa çatdı. 6-cı oyunda da “Boston”a qalib gələn “Qolden Steyt” tarixində 6-cı dəfə çempion oldu.

Bu qələbədə “Uorriorz”un oyun qurucusu Stefen Karri 34 xal, 7 ribaund və 7 məhsuldar ötürmə ilə önəmli rol oynadı. Seriyanın 5-ci oyununda 9 dəfə üçxallıq atışa cəhd edən, lakin bir dəfə də səbətə düşə bilməyən, bununla da 233 oyunluq möhtəşəm seriyası qırılan Karri bu dəfə final fiti səslənən kimi göz yaşları içində parket üzərinə çökdü. Məhz 34 yaşlı amerikalı final seriyasının ən dəyərli oyunçusu sayıldı. O, jurnalistlər arasındakı sorğuda 11 mümkün səsin hamısını aldı. Karyerasında ilk dəfə MVP sayılan Karri 6 oyunun hər birində orta hesabla 31,2 xal toplayıb, 6 ribaund edib və 5 məhsuldar ötürmə verib. Zaman-zaman tənqid olunan ulduz final seriyasından sonra emosiyalarını heç cür saxlaya bilmirdi. “Qolden Steyt” “tvitter” hesabında qələbədən sonra paltardəyişmə otağında çəkilən videonu yerləşdirib. Komandanın əsas ulduzu həmin videoda məhz onu daim tənqid edənləri nəzərdə tutaraq, “onlar indi nə deyəcəklər” qışqırır. Yeri gəlmişkən, Karri final seriyalarında top ələkeçirməyə görə 9-cu yerə yüksəlib. O, “Boston”la 6-cı oyunda daha iki ələkeçirmə ilə göstəricisini 54-ə çatdırıb və Dueyn Ueydi arxada qoyub. MBA finallarında top ələkeçirməyə görə lider isə Mecik Consondu (102).

14 iyun
Qolden Steyt – Boston 104:94 (27:16, 24:23, 24:35, 29:20)
Seriyada hesab – 3:2.
17 iyun
Boston – Qolden Steyt 90:103 (22:27, 17:27, 27:22, 24:27)
Seriyada hesab – 2:4.