Premyer-liqa klubları üçün yay fasiləsi davam edir.

“Football-plus.az” xəbər verir ki, bəzi klublar yeni mövsümün hazırlığına start verib. Məsələn, son çempion “Qarabağ”. Ağdamlılar artıq 2 gündü “Azərsun Arena”da hazırlıq keçir. Qalan klublar isə gözləmə mövqeyindədi. Hamısı büdcənin təsdiqlənməsindən sonra fəaliyyətə başlayacaq. Bu məsələnin həlli ilə bağlı redaksiyamıza məlumat daxil olub. AFFA-dan maliyyələşən klubların büdcəsi iyunun 16-da təsdiqlənəcək. Söhbət, “Neftçi”, “Sumqayıt”, “Şamaxı”, “Turan Tovuz”, “Kəpəz” və “Səbail”dən gedir. Düzdü, “gəmiçilər” ASCO-dan maliyyələşir. Amma şirkətin SOCAR-la bağlılığını hamı bilir. Bu səbəbdən də komandada dəyişikliklər olsa da, büdcə hələ ki tam bəlli deyil.

Mənbəmizin iddiasına görə, “Neftçi”nin növbəti Müşahidə Şurasının iclası da təxirə salınacaq. Buna səbəb büdcənin qeyd etdiyimiz tarixdə təsdiqlənəcəyidi. Məhz bundan sonra flaqman əcnəbi məşqçi ilə danışıqları yekunlaşdırıb, yeni mövsümün hazırlığına başlayacaq.

İLKİN SULTANLI