Mövsümün sonunda “Şamaxı”dan ayrılan Kamal Bayramovun premyer-liqaya qayıdan “Turan Tovuz”a keçmək ehtimalı böyük idi.

Təcrübəli qolkiper artıq doğma rayonun komandası ilə razılıq əldə edib. Rəsmi müqavilə isə yaxın günlərdə açıqlanacaq. Dünən Bayramovla bu mövzu ətrafında söhbət etdik.

- “Turan Tovuz”a keçid nə vaxt rəsmiləşəcək?
- Müqavilə bağlamışıq. Rəsmən isə yaxın günlərdə açıqlanar.

- Müqavilənin müddəti nə qədərdi?
- Bir il.

- Yəqin doğma rayonun komandasına keçmək ürəyincə oldu.
- Əlbəttə. Bizim üçün doğma, əziz komandadı. Ona görə can-başla orda oynamağa çalışacağıq.

- Futbol ictimaiyyətində elitaya yeni qatılacaq komandaların autsayder olacağı ilə bağlı fikir var. Büdcə baxımından bəlkə də buna haqq qazandırmaq olar. Bu haqda fikrin maraqlıdı.
- Autsayder kimi baxdıqları “Qəbələ” Konfrans Liqasında oynayacaq. Çempionatın startından öncə bunu heç kim gözləmirdi. Futbolda belə şeylər olur. Ötən il kuboku qazanan “Keşlə” bu il autsayder oldu. Düşünürəm ki, indidən bu haqda fikir bildirmək yersizdi. Sadəcə, mübarizə aparmaq, çalışmaq lazımdı. Bunu çempionatın gedişi göstərəcək. Komandada möhkəm bünövrə qurmaq lazımdı. Ondan sonra nəticə də gələcək, hər şey də yaxşı olacaq.

- Komanda transferlər edir. Baş məşqçi də yetərincə təcrübəlidi. Bu baxımdan komandanın irəlililəyəcəyi şübhə doğurmur. “Turan Tovuz”un çempionatda sözünü deyəcəyinə inanırsan?
- Komandaya transfer olunan və bundan sonra olacaq futbolçularla yanaşı, baş məşqçi və rəhbərlik amilinin də böyük üstünlüyü var. Bunun da komandaya xeyiri olacaq. Belə deyim, Tovuz səfəri hər komandaya böyük çətinliklər yaradacaq.

- “Şamaxı”dan ayrılandan sonra qəzetimizə açıqlama verərkən bir neçə klubdan təklif gəldiyini demişdin. “Turan Tovuz”u seçməyinə səbəb doğma rayonun komandası olmasıdı, yoxsa başqa səbəb də var?
- Tovuzlu olduğuma görə mənim üçün ən doğma komandalardan biri “Turan Tovuz”du. 9 il premyer-liqada olmaması bizə çox pis təsir edirdi. Bəli, üç seçimim var idi. Tovuz komandasını seçməyimdə rəhbərlik və baş məşqçi amili də böyük rol oynadı. Ailəmlə birlikdə Bakıda yaşayırıq. Ona görə də Tovuza gedib-gələcəm. Bu baxımdan müəyyən çətinlik olacaq. Amma doğma klub olduğuna görə başqa komandaya getmədim.

- Rəhbərlik və baş məşqçi amilini vurğuladın. Deməli, bunlar da komandaya keçidində stimul oldu…
- Bəli. Klubun rəhbərləri ilə Ayxan Abbasov kimi məşqçinin bir yerdə olması həqiqətən bizim üçün böyük stimuldu. Bakı klublarında qalmaq mənə sərf edirdi. 3 övladım var, Bakıda oxuyurlar. Böyük oğlum “Qarabağ”da oynayır. Onların məşqi, dərsləri var. Amma futbol həyatı belədi, çətinliklər olur, gərək dözəsən. Ölkə çempionatında rayon komandaları az idi. Amma indi onların sayı artır. Təkcə mən yox, başqa futbolçular da belə hallarla üzləşir.

ŞAİR ABDULLA