Roman Abramoviç Böyük Britaniya hökuməti ilə “Çelsi”nin rusiyalı biznesmenə olan borc məsələsinin tənzimlənməsi üzrə danışıqlarda razılığa gəlib.

Bunun sayəsində klubun satışı prosesini əvvəlcədən təyin olunan son tarixə - mayın 31-nə qədər başa vurmaq mümkün olacaq. Abramoviç bir neçə ay əvvəl sahibi olduğu klubun ona olan 1,54 milyard funt sterlinq (təxminən 1,9 milyard dollar) borcundan imtina etdiyini bildirmişdi. Lakin yerli hökumətin biznesmenin bank hesablarını bloklaması borcun silinmə prosesini texniki cəhətdən qeyri-mümkün edirdi. Bu səbəbdən hakim dairələr Abramoviçin qərarını dəyişə biləcəyindən ehtiyat edirdilər. Hökumət bundan başqa, onun xeyriyyə məqsədi ilə sərf edəcəyi 2,5 milyard funt sterlinq (təxminən 3,1 milyard dollar) məbləğində vəsaitin taleyi ilə bağlı məsələni də yoluna qoymalıdı.