Bir müddət öncə ''Qalatasaray''la yeni müqavilə imzalamayacağını və mövsüm bitən kimi İstanbuldan ayrılacağını açıqlayan Luis Kamposla bağlı maraqlı xəbər yayılıb.

Yanvardan bu yana ''Cim-Bom''da prezidentin baş məsləhətçisi vəzifəsini icra edən portuqaliyalı futbol adamı PSJ-nin idman direktoru olmağa hazırlaşır. Əslində Kamposun Kilian Mbappenin ardınca ''Real''a yollanacağı gözlənilirdi. Amma Mbappenin PSJ ilə yeni müqavilə imzalamasından sonra onun da Paris klubunun rəhbərliyi ilə danışıqlara başladığı məlum olub. Qeyri-adi bir şey baş verməsə, PSJ-də Leonardonu məhz Kampos əvəzləyəcək.

Kamposla Mbappenin yaxşı münasibətdə olması çoxdan məlumdu. 57 yaşlı futbol adamı illər öncə ikinci liqada oynayan ''Monako''nu yenidən inşa edərək elitaya qaytarmışdı. Ən əsası ''Monako''nun akademiyasında məhz Kampos Mbappeni kəşf edib onun potensialını görmüşdü. Daha sonra Mbappe 2017-də PSJ-yə, Kampos isə ''Lill''ə yollanmışdı. Kampos açıqlamalarında dəfələrlə Mbappenin Neymardan üstün olduğunu və mütləq ''Qızıl top'' qazanacağını deyibsə, Mbappe Kamposu futbol dahisi adlandırıb və yüksəlişində onun əməyini qeyd edib.