Azərbaycan futboluna baş qoşdunsa, gündəlik xəbərlərlə yaxından maraqlandınsa, əyləncən də hazırdı, gülüş payın da.

Yeni mövsümdən elitada mübarizə aparacaq “Turan Tovuz”un Müşahidə Şurasının sədri Oqtay Abdullayevin “qaynarinfo”ya müsahibəsini oxudum, özümü zorla saxlayıram. Qəşş etmək istəyərdim, ətrafdakıların mənə dəli kimi baxmayacağına əmin olsaydım. Təbii, “Turan” (bezdim yanına “Tovuz”u qoşmaqdan...) elitaya xoş gəlir, səfa gətirir, ayağı sayalı olsun, bir daha məşəqqət içində yaşamasın. Deməli, Oqtay bəyə sual verilir ki, Tovuzun icra başçısı Məmməd Məmmədov sizə maliyyə dəstəyi ilə bağlı söz verdimi? AFFA “Turan”a yalnız 500 min manat verə biləcəyini deyəndən sonra klubda çalışanların canına üşütmə düşüb. Ona görə ki, bu pulla elitada oynamağın mümkünsüzlüyünü anlayırlar; 500 min elə Ayxan Abbasovun məşqçi korpusunun maaşı və komandanın Bakı səfərlərinin yolpuludu. Deməli, Şakaya pul lazımdı! Azərbaycan Amerika deyil ki, dolları özü bassın, valyuta içində üzsün və s. və i.a. Odu ki, birgə səylərlə “Turan”ı, “Kəpəz”i, sabah avropalılar önünə çıxacaq, pul xərcləmək baxımından özünü çoxdan yerə vuran “Qəbələ”ni bataqlıqdan çıxarmaq lazımdı.

Hə, mətləbdən əməllicə uzaqlaşdım. Oqtay bəy deyir ki, icra başçısı pul söz vermədi, amma komandanı kartof, soğan, meyvə ilə təmin edəcək. Bütün başqa təşəbbüslərdə “dama-dama göl olar” prinsipinə sığınmağın mümkünlüyünü, Süleymanla şahla qarışqanın nağılını bilirəm. Amma bu futbol elə zəhlətökən sahədi ki, kartof-soğanla ötüşdürmək alınmır. İndi bu kənd təsərrüfatı məhsullarının bazar qiyməti əl yandırsa da belə. Bunun kalorili yeməyi var, cürbəcür vitamini var, bərpa prosedurları var, qida rasionu var. İcra başçısı komandanı gündə üç dəfə kartof-soğan və meyvə ilə təmin edəcək, sonra da məğlubiyyətlər sıralananda onu da kəsəcək... Belə klub saxlamaq, futbol idarəçiliyi olur? Ya da belə çıxır ki, “peraşki” dönəmi arxada qaldı, artıq kartof-soğan dönəmi başlayır. Əslində “peraşki”nin də tərkibində kartofun çoxluq təşkil etdiyini nəzərə alsaq, Tovuzun göz bəbəyi olan bu məhsul Azərbaycan futbolunun özünəməxsus rəmzinə çevrilməkdədi. Çərçivəni yuxarı qaldırmaq lazımdı, Oqtay bəy! İcra başçısına deyin ki, heç olmasa, ət versin, Baxma, kartofun kalorisi hara, ətin kalorisi hara! Prinsipcə futbol klubunun nəzdində ferma da yaratmaq olar. Məsələn, Qaraxanlıdakı meydanın bir tərəfində ferma tikirsən, mal-heyvan bəsləyir, elə yerindəcə kəsib, şişə çəkir və futbolçuların nahar problemini həll edirsən. Mənə bu yol daha perspektivli görünür, nəinki kartof-soğanın və çiyələklə gilasın ümidinə qalmaq!

Amma dünənin lətifəsi təkcə Oqtay bəyin kartof-soğan söhbəti deyil e, Region Liqasında yaşananlardı. Deməli, mayın 15-də 2-ci finalçının da adına aydınlıq gəlib və bir gün əvvəl bu hüququ qazanan “Cəbrayıl” “Araz-Naxçıvan”la oyunun hazırlığına başlayıb. Amma AFFA İntizam Komitəsinin dünənki qərarından sonra məlum oldu ki, Cavid Hüseynovun komandası həlledici oyunda “Xan Lənkəran”la qarşılaşacaq. Lənkəranlılar üç gün idi haray-həşir salmışdı ki, naxçıvanlıların heyətində “lipa” var, bu məsələyə baxın. Qəzetimizin ötən sayına müsahibə verən “Araz-Naxçıvan”ın baş məşqçisi Azər Bağırov daş atıb.

HUŞƏNG