Bazar günü Region Liqasının 1/4 finalının ilk oyunları keçirildi.

“Energetik” evdə “Cəbrayıl”a məğlub oldu. Cavid Hüseynovun komandası 2018-ci ildən bəri Yaşar Məmmədzadə adına stadionda uduzmayan mingəçevirlilərlə matçdan qələbə ilə ayrıldı. Görüşdən sonra veteran futbolçu ilə həm oyun, həm də komandanın gələcəyi ilə bağlı söhbətləşdik.

- Maraqlı görüş alındı. İlk oyunda “Energetik”i məğlub etdiz.
- Əvvəlcədən çətin keçəcəyini bilirdik. “Energetik” 2018-ci ildən bəri öz meydanında uduzmurdu. Düzdü, rəqib həddən artıq güclüdü. Bu səbəbdən də matça çox yaxşı hazırlaşmışdıq. Əzmimiz nəticəsində görüşdə sevinən tərəf olduq. Futbolçular meydanda döyüşdülər. Düzdü, burda ot örtüyü bərbad vəziyyətdədi. Oyunda əsasən xarakter ön plana çıxdı. Əzmkarlıq göstərərək sonda qələbə qazandıq.

- Səfərdə qələbə qazanmaq mərhələnin taleyini həll etdi?
- Yox. Neçə top fərqi ilə öndə olsaq da, mərhələnin taleyi həll olunmuş sayılmır. Binədəki oyunda hər şey bəlli olacaq. Burdakı görüşə necə hazırlaşmışdıqsa, həmin matça da eyni istəklə hazırlaşacağıq.

- Səhv etmirəmsə, “Cəbrayıl” azarkeşləri ilk dəfə fanklub şəklində səfər matçına gəldi. Ümumiyyətlə, stadionda 4 minə yaxın insan var idi. Ab-hava haqda nə deyə bilərsiz?
- Bəli, ilk dəfə səfərə gəlirdilər. Belə ab-havadan kim məmnun qalmaz?! Mən şəxsən hər yerdə vurğuluyaram ki, Mingəçevir futbol şəhəridi. Çünki bu insanlar idmana böyük sevgi və hörmət göstərirlər. Bir dəfə bura xeyir işə gəlmişdim. Şəhərdə bir gün gəzdim. Hamı məni tanıdı. Onda şoka düşmüşdüm. Necə ola bilər ki, bölgədə bu qədər adam məni tanıyır? Burdan görünür ki, Mingəçevir futbolla nəfəs alan şəhərdi. İnşallah, yaxın gələcəkdə ot örtüyünü dəyişərlər, arenanı düz-əməlli təmir edərlər. Bir sözlə, bu şəhərin mütləq gözəl komandası olmalıdı.

- Deyilənə görə, 1/4 finala vəsiqə qazanan 6 klub və “Araz Naxçıvan” növbəti mövsüm 1-ci divizionda iştirak edəcək. Bu barədə AFFA rəsmilərinin sizlə hansısa söhbəti olmayıb?
- Bizə belə məlumat verilməyib. Əlbəttə, mən də istəyirəm ki, növbəti mövsüm 1-ci divizionda çıxış edək. Çünki biz də əməlli-başlı əziyyət çəkmişik, belə komanda formalaşdırmışıq. Daha səviyyəli liqada iştirak etmək istəyirik. Amma əvvəlcədən bizə nəsə deyilməyib.

- Ramin Musayev Şamaxıda açıqlama verdi ki, işğaldan azad olunan bütün şəhər və rayonlarda stadion tikiləcək, komanda qurulacaq.
- Onsuz da bizim öncədən fikrimiz Cəbrayıl olub. Rayonumuzda əvvəllər də stadion olub. Hələ işğal dövründən öncə komandamız fəaliyyət göstərib. SSRİ dövründə də Azərbaycanın ikinci dəstəsində iştirak etmişik. Yəni Cəbrayılda həmişə futbol və idman olub. Bu səbəbdən tələsirəm ki, ordakı stadionu bizə təhvil versinlər. Fəaliyyətimizi orda daha yaxşı şəkildə davam etdirək. Həmçinin akademiya yaratmaq istəyirəm. Orda məskunlaşan peşəkar komanda fəaliyyət göstərsin. Oranı inkişaf etdirmək artıq mən və dostlarımın üzərinə düşən işdi.

- Rəqib qol vurandan sonra futbolçular arasında dava düşdü. Sizi həmişə çılğın insan kimi tanımışıq. Özünüzü necə saxladız, çətin olmadı?
- Vallah, çox çətin idi. Çünki əməlli-başlı azarkeş kütləsi var idi. İstəmirdilər ki, komandaları doğma meydanda məğlub olsun. Bu normaldı, onların aqressivliyini başa düşürəm. Amma bəzi təhqirlər olmasaydı, daha yaxşı olardı. Çünki mən 16 yaşından peşəkar futbolla məşğulam. Yersiz nələrsə baş verəndə xətrimə dəyir. Heç vaxt istəmərəm ki, rəqibim də olsa, ona haqsızlıq olsun. Söyübsə, üzr istəməlidi. Amma azarkeşlərin də təzyiqini başa düşmək lazımdı. Bir neçə dəfə keçərsən, amma bəzi sözlər adama çox pis təsir edir. Həkimimizin də başını partlatdılar (gülür). Təzyiqi qalxmışdı. Bu da normal şeydi. Azarkeşlər nələrsə etməlidilər ki, oyun daha da maraqlı olsun. Təki həmişə stadionlarımızda çoxlu tamaşaçı olsun. Öz komandalarını dəstəkləsinlər. İnşallah, futbolumuz belə oyunların sayəsində inkişaf edər.