Kənan Babayev Bolqarıstanda gənc boksçular arasında keçirilən Avropa birinciliyində növbəti döyüşünə çıxıb.

"Football-plus.az" saytının məlumatına görə, ölkə çempionu 1/4 finalda Gürcüstan təmsilçisi Oruc Əhmədovla üz-üzə gəlib.

İlk döyüşündə türkiyəli Telet Yağlını mübarizədən kənarlaşdıran boksçumuz ikinci görüşünü də hesabına yazıb. 48 kq çəki dərəcəsində qüvvəsini sınayan Babayev rəqibinə 5:0 (29:28, 30:27, 29:28, 29:28, 29:28) hesabı ilə qalib gəlib.

Kənan bu qələbə sayəsində yarımfinala yüksəlməklə yanaşı, özü üçün ən azı bürünc medalı da təmin edib. O, aprelin 20-də təşkil olunacaq 1/2 finalda irlandiyalı Tedi Coysla münasibətinə aydınlıq gətirəcək.


Qeyd edək ki, turnirdə daha 2 boksçumuz 1/4 final döyüşünə çıxacaq.