Naqelsmann və anası ölüm təhdidləri alır!
''Bavariya''nın Çempionlar Liqasının 1/4 finalında ''Vilyarreal''la dueldə sensasiyon şəkildə mübarizəni dayandırmasından sonra bu komandanın baş məşqçisi Yulian Naqelsmann kəskin tənqid atəşinə tutulmaqda davam edir.
Bu günlərdə klubun sabiq baş direktoru Karl-Haynts Rummenigge ''Kikker''ə verdiyi müsahibədə Naqelsmannın taktikasını və üçlü müdafiə sistemini tənqid etmişdi. Sən demə 37 yaşlı mütəxəssis həm də ölüm təhdidləri alır. Bunu Naqelsmann özü açıqlayıb:
''Son uğursuzluğun ardından ciddi tənqid olunacağımı bilirdim. Bu, normaldı və bu durumun öhdəsindən gələ bilərəm. Rummeniggenin tənqidləri ilə də yaşaya bilərəm. Amma ''instaqram''da 450-dən çox ölüm təhdidi almışam və bu artıq çox ciddi məsələdi. İnsanların məni öldürmək istəməsini hardasa, başa düşmək olar. Amma onlar eyni sözləri anama da yazırlar! Halbuki anamın ümumiyyətlə futbola marağı yoxdu. Bizim hətta qalib gəldiyimiz matçlardan sonra da təhdidlər aldığım üçün bütün bu yaşananlar məni təəccübləndirmir. Bu insanlardan polisə şikayət edə bilərəm. Amma bilirəm ki, bu cür mesajlar yenə gəlməkdə davam edəcək. Artıq bunları ciddiyə almamağa çalışıram. Təbii ki, hər kəs istədiyini söyləməkdə sərbəstdi. Amma bəziləri tərbiyəni unudub bütün sərhədləri aşırlar. Ən dəhşətlisi odu ki, onlar belə etməklə özlərini haqlı çıxarmağa çalışırlar''.
