Misli premyer-liqasının 32-ci turunda “Zirə” evdə “Sumqayıt”ı məğlub etdi - 2:1.

“Football-plus.az” xəbər verir ki, oyunsonrası mətbuat konfransında Rəşad Sadıqov jurnalistlərin suallarını cavabladı.

- Futbolçularımı təbrik edirəm. Oyuna köklənmək çətin idi. 3 gün əvvəl ağır oyuna çıxmışdıq. Final fitinə qədər vuruşdular. Söhbət udub-uduzmaqdan getmir. Rəqib qapıçı möhtəşəm idi. Futbolçularıma əzmkarlığına görə təşəkkür edirəm.

- “Sabah”ın start heyətini görəndə verdiyiniz reaksiya maraqlıdı.
- Gizlətməyəcəm (gülür) Məyusluq keçirdik. “Neftçi”ni ürəkdən təbrik edirəm. Amansız mübarozə apardılar. Amma rəqabət var. Start heyətini görəndə məyus oldum.

- İssa Cibrila yenə zədələndi?
- Mövsümdə 6-cı dəfə zədələndi. Hücum planında çox problem yaşadıq. Utziq və Suma kimi futbolçular itirdik. Quba bataqlığında Volkovla Cibrila zədələndilər. Bütün mövsüm bugünkü oyunun axarının göstəricisi idi. “Şamaxı” və bir neçə ev oyunlarında son nöqtədə problem yarandı. Bu gün çempiondan sonra ən az qol buraxan komandayıq. Finala qədər gəldik, sona qədər mübarozə apardıq. Avrokubokda “Hayduk” kimi komandaya əlavə vaxtda uduzduq. Legioner limiti ləğv olundu və yayda seleksiyadan çox şey bəlli idi. Rəqiblər yayda seleksiyada bizi üstələdi. Nəticə çıxarıb, düzgün addımlar atmağa çalışacağıq.

- Azarkeşlərlə də sonda müzakirəniz oldu…
- “Zirə”nin çoxlu azarkeşi yoxdu. Bir-birimizi üzdən tanıyırıq. Ərənlə bağlı sual verdilər, anlamadım, onu soruşurdum. Azarkeşdilər nəticə istəyirlər. Onları anlayıram.

- Cavid Cəlilov “Zirə”nin oyununda cəzalanmışdı və ilk təyinatı bu oyuna oldu.
- Açığı, mən də bu təyinatı anlamadım. Kim cəzalanıbsa, nə hikmətdisə, “Zirə”nin oyununda cəzalanıb. Bəlkə də olub, biz hiss etməmişik. Cavid Cəlilovun baş hakim, İnqilab Məmmədovun VAR hakimi olmasını anlamadım. Mənə maraqlıdı, İnqilab Məmmədov niyə cəzalandı? O epizoda ya yan xətt hakimi, ya da VAR qarışmalı idi. Belə çıxır ki, baş hakim ofsayda müdaxilə edə bilər. Bu o anlama gəlir. VAR-a baxıb, qərar versə, anlayardım. Onun cəzasının nə ilə bağlı olduğunu anlamadım.

MÜZƏFFƏR QULUZADƏ