Premyer-liqanın 31-ci turunda evdə “Karvan-Yevlax”ı məğlub edən (1:0) “Turan Tovuz” 32 ildən sonra avrokuboklara vəsiqə qazandı.

“Football-plus.az” bu uğurla bağlı klubun ilk prezidenti Vidadi Əhmədovun fikrini öyrənib.

– Şad xəbər sizə hansı hissləri yaşatdı?
– Əlbəttə, böyük sevinc hissiylə qarşıladım. Həm klub rəhbərliyini, ordakı dostları təbrik etdim, həm də məni təbrik edənlər oldu. Bu yaxınlarda mərasim təşkil ediləcək. Orda bu uğuru qeyd edəcəyik. “Turan” mənim üçün həmişə əzizdi, doğmadı. Bundan sonra da belə olacaq.

– Klub addəyişmə prosesiylə bağlı işlər də görür. Ancaq hələ nəticə yoxdu...
– Bu məqam məndə böyük təəssüf hissi doğurur. Mətbuatda yazılıb ki, komanda 32 ildən sonra ilk dəfə avrokuboklarda oynayacaq. “Turan”ın tarixini silmək olmaz, bu, çox böyük nöqsandı. Klubun adını qaytarmaq lazımdı. İnşallah, bütün məsələlər həll olunar və “Turan” adına yenidən qovuşarıq.

– Kurban Berdıyev baş məşqçi postunda qalmalıdı? Onun oyun fəlsəfəsindən, sistemindən narazı olanlar çoxdu...
– Əlbəttə, qalmalıdı. “Turan”ın başqa klublarla müqayisədə böyük büdcəsi, gücü yoxdu. Bu gün komanda avrokuboklara vəsiqə qazanıbsa, rəhbərliyin, baş məşqçinin sayəsində bunu bacarıb. Kurban Berdıyev əldə olan imkanlardan maksimum yararlanıb. Başqa məşqçilərin hansı tələblərinin olacağı bilinmir. Düzdü, azarkeşlər güclü komanda, daha baxımlı oyun istəyə bilər, haqları var. Ancaq ayağı yorğana görə uzatmaq lazımdı.

KƏNAN BAHADIR