Misli premyer-liqasının 31-ci turunda “Neftçi” evdə “Şamaxı”nı darmadağın etdi - 3:0.

“Football-plus.az” “ağ-qaralar”ın baş məşqçisi Yuri Vernidubun oyunsonrası mətbuat konfransından hesabatı təqdim edir.

- Lobanovskinin taktikası o idi ki, komandası ilk dəqiqələrdən təzyiq edib, qol vurur və gözləyirdi. Ukraynalı baş məşqçilərin oxşarlığıdı, yoxsa onun oyun sistemini tətbiq edirsiz?
- Lobanovski böyük baş məşqçidi. Onu yaxşı tanıdığımı deməzdim. “Neftçi” adına layiq oyun göstərməyə çalışırıq. Bu komanda ilk dəqiqələrdən aqressiv oymamalıdı. Bizdən aşağıda gedən komandalara qarşı oyunda erkən qol vurursansa, oynamaq asan olur. Çox qol vəziyyəti yaratsaq da, qola çevirə bilmirdik. İkinci hissədə bunu bacardıq. Mənə xoşdu ki, futbolçularım belə oynayır.

- “Neftçi” “Sabah”ı da üç ildi məğlub edə bilmir. “Ağ-qaralar” Vernidubla bu həsrətə də son qoya biləcək?
- Bizim başqa çıxış yolumuz yoxdu. Hazırda turnir cədvəlində “Zirə” ilə aramızda 3 xal fərqi var. Bu heç nə demək deyil. “Sabah”la oyunda da yalnız nəticə üçün oynayacağıq. Onlar həm də kubokun finalına hazırlaşır, “qızıl dubl” edə bilərlər. Biz də əlimizdən gələni edəcəyik ki, bu oyunda qələbə qazanaq.

- Qapıçı mövqeyindəki dəyişikliyi daha tez etmək olmazdı?
- Burda xüsusi bir şey görmürəm. Piriç yaxşı qapıçıdı - Balayev kimi. “Qarabağ”a böyükhesablı məğlubiyyətdən sonra dəyişiklik etməliydim. 4 dəyişiklik etdim, biri də qapıda idi. Eyni səviyyəli iki qapıçımız var. Gələn mövsüm 2 oyun biri, 2 oyun da digəri şans qazana bilər.

- Abubakara şans verəcəksiz? Niyə oynamır? Əsas səbəb zədədi, yoxsa gedir?
- Hər oyunçu üçün şans olacaq. Ağadadaş haqda soruşurduz, iki matçdı oynayır. Onun əzmkarlığını xoşlayıram. Kim çalışacaqsa, o da oynayacaq.

MÜZƏFFƏR QULUZADƏ