Dünən Asiya Çempionlar Liqasının həlledici oyunu keçirildi. Cedda şəhərində yerləşən ''Sports Siti'' stadionunda baş tutan finalda Səudiyyə Ərəbistanı təmsilçisi ''Əl-Əhli'' ilə Yaponiya təmsilçisi ''Maçida'' üz-üzə gəldi.

"Football-plus.az" xəbər verir ki, əsas vaxtı qolsuz başa çatan matçın taleyi əlavə vaxtda həll olundu. 96-cı dəqiqədə Firas Əl-Bureykanın qolu ''Əl-Əhli''yə qələbə qazandırdı. Özü də bu komanda uzun müddət azlıqda oynamalı oldu. 68-ci dəqiqədə Zəkəriyə Əl-Havsavi birbaşa qırmızı vərəqə aldı. Bununla da ''Əl-Əhli'' ardıcıl ikinci dəfə Asiyanın ən güclüsü adını qazandı.

Ötən il bu kollektiv finalda Yaponiyanın digər təmsilçisi ''Kavasaki Frontale''dən üstün olmuşdu (2:0). Merih Dəmiral ötən il Asiya Çempionlar Liqasını qazanmış ilk türkiyəli futbolçu kimi tarixə düşmüşdüsə, bu il ikinci dəfə turnirin qalibi oldu. Sonuncu dəfə bu turniri ardıcıl iki il qazanmağı Səudiyyə Ərəbistanının digər təmsilçisi ''Əl-İttihad'' bacarmışdı (2004, 2005).