2019-24-ci illərdə “Azərsun Holdinq”də çalışmış, “Qarabağ”ın sadiq azarkeşi kimi tanınan, hazırda Liverpulda yaşayan Sevinc Məmmədova “Sabah”la oyundan sonra (0:1) “feybusk”da maraqlı status paylaşıb:

Bu mövzu ətrafında Sevinc xanımla söhbət etdik.

- Statusda vurğulamısız ki, “Qarabağ” “Neftçi” ilə oyunu təxirə salanda çempionluğu itirdi”. Həqiqətən belə düşünürsüz, yoxsa məğlubiyyətdən sonra yaranan aqressivlikdi?
- Mənim “Qarabağ”a və ya göstərdiyi qeyri-sabit nəticələrə aqressivliyim yoxdu. Bütün komandalar udar da, uduzar da. Statusda qeyd etdiyim məsələ şəxsi düşüncəmdi. Bundan əvvəlki mövsümlərdə də “Qarabağ” bir və ya bir neçə oyunu təxirə salmışdı. Məncə, bu çox normaldı. Ama qarşı tərəf bunu istəməyəndə təxirə salmaq, üstəlik bu qədər söz-söhbət fonunda bunu etmək kluba yaraşmadı. Məncə, “Qarabağ”ın bir duruşu, xarakteri var. Onu qazanmaq üçün illər sərf olunub. Həmişə rəqibə hörmət edən, “feyr-pley” nümunələri ilə hətta Avropanın gündəminə düşən komanda “Neftçi”nin oyunu təxirə salmamaq qərarına da hörmət etməliydi. Bunu etməyəndə artıq digər rəqiblər sənə əvvəlki gözlə baxmırlar. Futbol təkcə meydanda oynanılmır ki. Bunun psixoloji tərəfləri də var. Sənin rəqibin meydana çıxmazdan əvvəl sənin kim olduğunu düşünüb, psixoloji cəhətdən də hazırlaşır. Sən “Çelsi” ilə heç-heçə, “Benfika”nı məğlub edən, ÇL-də pley-offa çıxan komandasan. Sənin rəqibin bunları düşünərək meydana çıxanda artıq 0:1 məğlub durumda olur. Amma rəqibin görəndə ki, sən “Neftçi” ilə oynamamaq üçün israr edirsən, deyir “aha, gözümdə böyütdüyüm qədər deyilmiş”.

- Bu mövsüm ÇL-də uğurlu olan bir çox Avropa komandası çempionatda qeyr-sabit nəticələr nümayiş etdirir. Bu amilin də “Qarabağ”a təsiri oldu?
- Digər komandaların çempionatları ilə bizimki bir deyil. Amma, təbii ki, “Qarabağ” bu mövsüm daha çox oyuna çıxdı, daha çox güc sərf etdi, zədələr, yorğunluqlar da rol oynadı. Və ÇL-dən sonra daxili çempionata psixoloji cəhətdən uyğunlaşmaq da asan deyil.

- Futbol ictimaiyyətinin bir qismi də belə düşünür ki, “qoy “Qarabağ” çempion olsun, Avropada uğur qazansın. Başqaları bunu edə bilməyəcək”. “Sabah”ın avrokuboklarda uğurlu olacağını düşünürsüz?
- Mənə “Qarabağ”dan başqa komandaların nəticələri maraqlı deyil. Hansı nəticəni göstərəcəklər, bilmirəm. Bəzən avrokuboklarda təcrübə də rol oynayır. “Sabah”ın təcrübəsi azdı. Amma oyun tərzi çox gözəldi. Münasib rəqiblərlə qarşılaşsalar, uğurlu ola bilərlər.

- Bu mövsüm “Sabah” çempion olur, “Turan Tovuz”, “Neftçi” kimi komandalar da gələn mövsüm çempion olmaq üçün hazırlaşacaq. Bu nüansların “Qarabağ”ın inkişafına təsir edəcəyini düşünürsüz?
- Hər mövsüm Azərbaycanda iddialılar siyahısı dəyişir. Ona görə bu siyahının necə olacağını bilmək olmaz. “Qarabağ”a gəlincə, daha yaxşı olmaq üçün mütləq yayda köklü dəyişikliklər lazımdı. Qurban müəllim illərdi burdadı. O inkişaf üçün nə etmək lazım olduğunu bilir.

MÜZƏFFƏR QULUZADƏ