Futzal Federasiyasının və Naxçıvan Futbol Federasiyasının prezidenti Zaur Axundov “Qol.az” saytına müsahibədə bir çox mətləblərə toxunub. Onun “Araz-Naxçıvan”ın taleyi ilə bağlı dedikləri öz yerində. Burda da əlavə suallar yaradan məsələlər var ki, zamanla hər şeyə aydınlıq gələcəyini təxmin edirik. Lakin futzalın durumuyla bağlı sözləri heç də həqiqətəuyğun olmadı:

Zaur bəyin də dediyi kimi, milli toplanışlar çərçivəsində keçirdiyi 4 matçın hamısında uduzdu. Amma “ciddi problem yoxdu” demək ayıbların üzərini pərdə ilə örtməkdən başqa şey deyil. Ona görə ki, futzalda həddən artıq ciddi problemlər var. Mövsümün əvvəlindən bəri yüksək liqada çıxış edən “Lənkəran” maliyyə problemləri üzündən fəaliyyətini dayandırdı. “Şuşa” da həmin səbəbdən bir oyunda meydana çıxmadı. Təbii ki, bu problemi aradan qaldırmaq birbaşa federasiyanını öhdəliyi deyil. Ancaq günahkarlardan biri də federasiyadı. Ona görə ki, qurum söz verilən məbləği vaxtında klublara ödəmədi. Yerli futzalçıların əksəriyyəti məhz adı çəkilən komandalarda çıxış edir. Bəli, “Araz-Naxçıvan”, “Neftçi” və “Baku Fire”ın da yerli oyunçuları var. Ancaq onların sayı güclü milli komanda formalaşdırmaq üçün yetərli deyil.

Ümumiyyətlə, futzalımız uçuruma doğru gedir. Son dövrlərdə nə yüksək liqada çıxış edən komandalardan, nə də millilərdən “dişə vurulası” uğur görməmişik. Çoxu maliyyə çatışmazlığından, azarkeş marağının olmamasından, yeniyetmələrin bu sahəyə yaxın düşmək istəməməsindən gileylənir. İş o həddə çatıb ki, bu idman növü UEFA və FİFA tərəfindən tanınmayan, həvəskar status daşıyan minifutbola uduzur.

Doğruları danışaq, Zaur bəy...

KƏNAN BAHADIR