2022-ci ilin iyulunda PFL prezidenti postundan gedən Ramin Musayev artıq uzun müddətdi futbol təsərrüfatında yoxdu. Həmin vaxtdan bəri Novxanıda – bağ evində yaşayır. Təbii ki, futbolda başverənlərlə yaxından maraqlanır. Onunla söhbətdə bəzi suallara cavab tapmağa çalışdıq.

2-ci hissə

- Hansı komandanın oyununu daha çox bəyənirsiz? Sizcə, “Neftçi” bu minvalla avrokuboklara yollana bilər?
- “Neftçi”nin avrokuboklara yollana bilməsi çətindi, inanmıram. Çempionatın əvvəlində də demişdim ki, “Neftçi”yə sözünü deyən rəhbər lazımdı. Daim komandanın yanında olmalıdı. “Neftçi” hamımızın sevdiyi, azarkeşlik etdiyi komandadı. Onlara uğurlar arzulayıram.

- “Turan Tovuz” haqda fikirləriniz necədi? Yaxşı nəticə, baxımsız oyun. Komanda avrokuboklara yollansa, Kurban Berdıyevi cansıxıcı oyuna görə göndərmək nə dərəcədə doğru qərar olar?
- “Turan Tovuz” çempionatın əvvəlindən hakim səhvləri ilə üzləşib. Buna qərəz deməzdim. Çünki səhv edən hakimlərin içində tanıdıqlarım da var. Son vaxtlar Əliyar Ağayevi çox tənqid edirlər. Amma insan səhvə yol verə bilər. İnanmıram ki, qərəzli qərar versin. O tərbiyənin sahibi deyil. Sözünü demiş hakimdi. Əsas odu ki, bilərəkdən etməsin. Məşqçi məsələsində qalanda, yeni məşqçi gəlsə, komanda avrokuboklara yollansa, heç bir uğura nail ola bilməz. O komandaya gəlməlidi, futbolçularla tanış olmalıdı, kimin nəyə qadir olduğunu bilməlidi. Bu da vaxt tələb edir. “Turan Tovuz” rəhbərliyinin fikri bilmirəm nədi, amma futbolda çalışmış, əziyyət çəkmiş bir adam kimi deyirəm ki, o məşqçini dəyişmək düzgün olmaz. Avrokuboklardakı oyunları da çox görüb. Bu təcrübədən istifadə etmək lazımdı.

- Bildiyim qədəri ilə Rəhim Həsənovla çox yaxın olmusuz. Bu əlaqə hələ də davam edir? Onun Hakimlər Komitəsinin sədri kimi işini necə dəyərləndirirsiz?
- Rəhim Həsənovla salam-sağolumuz var. Xətrini istədiyim insandı. Ən vacibi odu ki, öz yetirməmizdi, öz millətimizin balasıdı. Pis insan deyil, pis hakim olmayıb. Ona bəzən irad bildirilir, amma kənardan söz demək asandı. İşin içində olmaq lazımdı. Rəhimə vəzifə veriləndə sevindim. Hakimləri tanıyır, bir yerdə işləyiblər. Uğurlar arzulayıram, Allah köməyi olsun.

MÜZƏFFƏR QULUZADƏ