2-ci liqada mübarizə aparan, ilk üç turda bütün oyunlarda böyük hesabla uduzan, ümumilikdə 10 qol buraxan “Dinamo”nun hətta bu liqada yerini qoruya bilməyəcəyini düşünənlər də var idi. Həmin vaxt klubun prezidenti Yaşar Seyidovla da danışmışdıq. O, fors-major olduğunu, futbolçuların təcrübə çatışmazlığı yaşadıqlarını, mövsümün gedişatında nəticələri düzəldəcəklərini demişdi. Yaşar bəy arxayın şəkildə 2-ci liqada qalacaqlarını iddia edirdi. Bu baş verdi. Amma uğur ikiqat oldu. Belə ki, “Dinamo” ilk “6-lığ”a düşə bildi.

Bu haqda təcrübəli futbol adamı ilə kiçik söhbətimiz oldu.

- Mövsümün əvvəlində komanda 4 oyundan sonra 1 xalla aşkar autsayder idi. Amma arxayıncasına 2-ci liqada qalacağınızı deyirdiz, belə də oldu. Bu əminlik hardan idi? 
- Çempionatın başlamasına iki gün qalmış 9 futbolçu komandadan ayrıldı. Vaxt lazımdı idi ki, toparlanaq. Gənclərin və təcrübəlilərin vəhdəti ilə çətin də olsa, komanda formalaşdırdıq. Maliyyə çətinliyinə baxmayaraq, istədiyimizi etdik. Daha yüksək pillələri haqq edirdik. Aparıcı oyunçularımızın getməsinə görə yaxşı başlamamışdıq. Aşağı yaş komandaların futbolçularını cəlb etdik, onlar da özlərini göstərdilər.

- Və sonda ilk “altılığ”a da düşdüz. Belə hədəfiniz var idi?
- Sözün açığı, yox. İnanırdıq ki, tanınmayan futboçuları da həmişəki kimi ölkə futboluna qazandıracağıq. Belə də oldu. Onlar da təcrübəlilərlə vəhdət qurub, 6-cı olmağı bacardılar.

- Komanda qışdan sonra vacib qələbələr qazandı. “Şəki”nin də qeyri-sabit nəticələr göstərməsi son turlarda 6-cı olacağınız təəssüratını yaratmışdı. Heç olmasa, son turlarda futbolçuların qarşısına belə hədəf qoymuşduz?
- Qışdan sonra keçirdiyimiz 8 oyunun ilk altısında ardıcıl qələbələr qazandıq. Son iki oyunda liderlərlə matçda xal itirdik. Qələbələr olduqca inam da artır. Futbolçuların birliyi qələbələrin gəlməsinə rol oynadı. Düzdü, rəqiblər də qeyri-sabit oldu. Amma uşaqların haqqına girmək istəmirəm. “Quba”, “Şirvan” kimi komandalara qalib gəldik. Futbolçuların, məşqçilərin işini yaddan çıxarmaq olmaz.

- Son qarşılaşmalarda protokolda baş məşqçi kimi İbrahim Uzuncanın adı yazılır. “Bakı”da onunla işbirliyiniz olub. İndi də bunun davam etdiyini deyə bilərik?
- İbrahim Uzunca bizə doğma adamdı. Nə gizlədim, hədəfimiz həmişə 1-ci liqaya çıxmaq olub. AFFA-nın lisenziyalaşdırmasına görə struktur, idman meyarlarımızı formalaşdırırıq. Ona görə deyirik ki, şansımız yaransa, lisenziya tələbini sənədləşmə ilə aparaq. Ötən mövsüm İcraiyyə Komitəsinin ani qərarı ilə üç komanda birdən 1-ci liqaya yüksəldi, 4-cü olan “Quba” pley-off-da uduzdu. Həyatdı, bilmək olmur. Komitə birdən belə qərar qəbul etsə, struktur 1-ci liqada oynamağa cavab versin.

- Sənəd üzərində baş məşqçi Uzuncadı. Bəs komandanın məşqlərində iştirak edirmı? Bu uğurda onun da payı var?
- Daimi əlaqədəyik, fikir mübadiləsi aparırıq. Bizim üçün doğma adamdı. “Bakı”da uzun illər birgə çalışmışıq. Maliyyə vəziyyətimiz düzəlsə, məşqçi kimi komandada daha çox olmasına, rəhbərlik etməsinə şad olaram.

MÜZƏFFƏR QULUZADƏ