"Zirə" Misli premyer-liqasının 19-cu cur matçında "Sumqayıt"ı məğlub etdi - 3:2.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Baxımlı oyunun şahidi olduq. Komandalar daha çox texnikalı, kombinasiyalı oyuna üstünlük verdi. Birinci hissə bizim üçün daha yaxşı keçdi. Üstün idik. Bəlkə hesab daha fərqli ola bilərdi. Rəqib ikinci hissəyə çox fəal başladı. Biz isə o dəqiqələrdə düzgün reaksiya vermədik, bir az passivləşdik və qol buraxdıq. Bundan sonra komandanın verdiyi reaksiya yaxşı idi. Oyunun nəzarətini ələ keçirdik, hücumlar təşkil etdik. Rəqibin 80-cı dəqiqədən sonra bir neçə təhlükəli standart vəziyyətləri oldu. Ümumən qələbəyə layiq idik. Çox önəmli qələbə qazandıq. Futbolçularımı göstərdikləri oyuna və qələbəyə görə təbrik edirəm.

- Özünüz də qeyd etdiz ki, "Sumqayıt" fasilədən sonra daha fəal oynadı. Bu rəqibin taktiki gedişindən qaynaqlanırdı, yoxsa futbolçular tapşırıqlarınızı yerinə yetirə bilmirdi?
- Fasilədə futbolçulara dedik ki, ikinci hissəyə daha fəal başlayaq. Çünki "Sumqayıt"la birinci dövrənin oyununda iki fərqli hissənin şahidi olmuşduq. Birinci hissədə biz yaxşı oynamışdıq, ikincidə "Sumqayıt". Futbolçulara xatırlatdıq ki, bu komandaya qarşı passiv başlamaq olmaz. Çünki onların hücum potensialı çox güclüdü. Ancaq biz passiv, rəqib çox fəal başladı. O dəqiqələr bizim üçün çox ağır keçdi. Qol da gözlənilən idi. Həmin dəqiqədə qol olmasaydı da, ola bilər sonrakı dəqiqədə qol buraxardıq. Hər halda, buraxdığımız qol xeyrimizə oldu. Komanda ondan sonra ayıldı və daha fəal oynadı. Hücumlar edirdik, amma sonluq gəlmirdi. Elə oldu ki, 89-cu dəqiqədə qol vurduq. Sonradan meydana daxil olan futbolçuları ayrıca qeyd etmək istəyirəm. Çünki hər biri oyuna çox yaxşı qoşuldu. Qələbəmizdə əsas pay onların idi.

- Bu gün xarakter qələbə qazandı, yoxsa ustalıq?
- Qələbə qazanmaqdan ötrü bunların hamısı birlikdə olmalıdı. 1-2 oyun xarakter və ya ustalıq hesabına qalib gələ bilərsən, amma uzun marafondusa, sabit çıxış etmək istəyirsənsə, burda bütün komponentlərdə yaxşı keyfiyyətlərin olmalıdı, ən yaxşısını etməyə çalışmalısan. "Sumqayıt"a qarşı kubok görüşündə də futbolçularımdan razı idim. Analizə baxdıq, çoxsaylı qol epizodlarımız var idi. Onda da demişdim ki, çempionat matçı daha çətin olacaq. Bu gün "Sumqayıt" çox yaxşı idi. Bu cür oyunlar nə qədər çox olsa, çempionatımız maraqlı olacaq, futbolumuz inkişaf edəcək.

- "Sumqayıt"la kubokda da rəqibsiz. Bu gün qazanılan qələbə "Sumqayıt" üzərində psixoloji üstünlük qazandıracaq?
- Bunu bəlkə hardasa çempionatda qeyd edə bilərik ki, rəqibdən bir-iki xal önə keçdik, psixoloji üstünlük yarandı. Amma kubok elədi ki, hər şey sıfırdan başlayacaq. İlk görüş 0:0 bitib. Orda bir top üstünlüyümüz olsaydı, deyərdik ki, hansısa üstünlük var. "Sumqayıt"ın gücünü nəzərə alaraq, deyə bilmirik ki, nədəsə üstünük. Şanslar 50/50-di. O oyuna qədər vaxt var. Çalışacağıq ki, zədəlilər qayıtsın, heyətimizi də tam komplektləşdirək. Çünki itkilər nə qədər az olsa, oyunun keyfiyyətinə təsir edir. Məsələn, bu gün "Sumqayıt"da bəzi itkilər var idi. Onlar da olsaydı, bizim üçün daha çətin olardı. İtki hər komandaya təsir edir. Onların sayı 3-4 oldusa, onu aradan qaldırmaq çətindi, oyuna təsir edir.

- Avrokuboklar uğrunda mübarizə komandalar arasında aşağı-yuxarı "Sumqayıt"la eyni büdcəyə maliksiz. Bu məsələ sizi yormurki? Mübarizə aparırsız, amma büdcənin az olması sizə təsir edir...
- Altıncı ildi ki, "Zirə"nin baş məşqçisiyəm. Komandanın müəyyən siyasəti, strategiyası var. Bu yola rəhbərliklə birlikdə çıxmışıq. Təbii ki, müəyyən məqamlarda könül istərdi ki, fərqli futbolçularla da komandanı gücləndirəsən. Amma əlimdə olan oyunçulardan da hər zaman razıyam. Onların potensialı daha çoxdu. Sadəcə bəzən zamana ehtiyac olur ki, müəyyən futbolçular da potensialını açmaqdan ötrü daha çox məşq etməli, daha çox oynamalıdı. Ümumən durumdan məmnunuq. Əldə olan imkanlara uyğun ən yaxşısını etməyə çalışırıq.

- "Neftçi" ilə matçdan sonra bildirmişdiz ki, mövsümün ikinci hissəsi çətin olacaq. Bu çətinliyə qarşı hansısa ehtiyat variant hazırlamısız?
- Ən yaxşı variant futbolçuların ideal, pik formada olmasıdı. Danışıqlar gedir, rəhbərlik razılıq verib. Bəlkə bir futbolçu ilə gücləndik. Bu gün xəbər olmalıdı, gözləyirik. Bu dəqiqə ən yaxşı "silah" futbolçuların yaxşı formada olmasıdı. Onlar da çalışır, istəklidi. Düşünürəm ki, yaxşı olar.

- Yeni gələcək futbolçunun mövqeyi nədi?
- Hücum mövqeyinə gətiririk. Sırf hücumçu deyil. Amma həm hücumçu kimi oynayır, həm də vingerdi.