“Liverpul”un ev oyunlarını keçirdiyi, 142 illik tarixə malik “Enfild” nəinki İngiltərə, hətta dünya futbolunun məbədlərindən sayılır.

Və 1995-ci il sentyabrın 26-da həmin stadionun qazonuna çıxanlardan biri də azərbaycanlı olub. Nazim Süleymanovun şərəfini qoruduğu “Spartak-Alaniya” UEFA kubokunun 1-ci mərhələsinin cavab görüşündə “Liverpul”la heç-heçə etməklə (0:0) turnirdə mübarizəni dayandırıb.

“Qarabağ”ın sabahkı oyunu ərəfəsində Nazim bəy “Football-plus.az”a danışdı.

- “Liverpul”a 1:2 uduzduğunuz ilk oyunda Valeri Qazzayev sizə şans verməmişdi. Niyə? Yadınızda qalıb?
- Yadımdadı, elə şeyi yaddan çıxarmaq olar?! Axşam saat 8-də oyun başlayacaqdı. Səhər 11-in yarısı ənənəvi məşqimiz var idi. Məşq etdik, heyətdə olmalıydım. Elə açıqlanmışdı. Oyunla bağlı təlimatları paltardəyişmə otağında verdi. Saat 6-da stadionda getdik. Məni start heyətinə salmadı. Nəinki start heyətinə, heç “18-liy”ə də.

- Heç nədən belə qərar verdi? Mövqeyinizdə kimi oynatdı?
- Bəli, heç nədən. Mənim mövqeyimdə Murtaz Şeliya, Mircəlal Kasımov da oynayırdı.

- Bəs bu qərarın səbəbini soruşmadız?
- Oyun ərəfəsində bunu soruşmaq yersiz idi. Tribunaya qalxdım, oyuna ordan baxdım. Özümü yaxşı hiss etmirdim, ikinci hissənin yarısından sonra getdim evə. Məni oynamağa qoymadı, gedib dava edəsi deyildim ki… Onu da xatırlayıram ki, oyun günü səhər tezdən Vladimir Qutsayev məşq qutandan sonra məni qucaqlayıb dedi ki, “Nazim, sən bu gün qol vurmalısan e”. O bunu deyəndə içimdə belə hiss yarandı ki, burda nəsə var. Sonra da heyətdə olmadım. Demək olar ki, gürcülər oynadı da… (Süleymanov düz deyir: start heyətində yer alanlardan dördü Gürcüstanda doğulub – red.) Cavab oyununa hazırlaşanda yaxınlaşdım Qazzayevə, dedim ki, məni komandaya götürmüsüzsə.... Mən legionerəm, ancaq “Fakel”ə, “Tekstilşik”ə qarşı oynayacam? Yaxşı futbolçu “Liverpul”a qarşı oynamalıdı da.

- Cavab oyununda niyə “Liverpul”u keçə bilmədiz? Şanslarınız oldumu?
- İlk oyunda Vladiqafqazda 2:1 qələbə qazanmışdılar deyə, 0:1 uduzsaydılar da, keçəcəkdilər (əvvəllər “səfər qolu” qaydası var idi – red.). Qol epizodlarımız oldu. Elə mənim də. İkinci hissədə Baxva Tedeyevlə “divar pası” oynadım. Ona ötürdüm, açıldım, gördüm ki, qapıçı Ceyms artıq yanımdadı. O meydança ancaq futbol üçün nəzərdə tutulub, ora gərək alışasan. Elə “Enfild”ə girəndə adamı vahimə basır. Adam o stadionda məşq etmək, oynamaq istəyir. Birinci hissədə cinahdan Kanişevə ötürmə verdim, 5 metrdən qapıya düşə bilmədi.

- Mən də elə söhbəti bura gətirəcəkdim. Deyirsiz ki, “Enfild”də adamı vahimə basır, orda oynamaq istəyir. Bu stadionun xüsusi aurası varmı?
- Adam belə stadion, azarkeş görəndə... Mən belə azarkeşləri “Reyncers”lə səfər oyununda görmüşdüm. Stadionun və azarkeşlərin aurası tam başqadı. Görməyəndə başqa hisslər keçirirsən, öyrəşəndə tam başqadı. Deyirlər e, 12-ci oyunçu, azarkeş. Onu Liverpulda, Brüggedə, Qlazqoda gördüm.

- “Qarabağ”ın futbolçuları bu səviyyədə Avropada yetərincə oyun keçirib. Amma “Enfild”in aurası futbolçulara pis mənada təsir etməz ki? Nədən çəkinməməli, qorxmamalıdılar?
- İnanmıram ki, təsir etsin. “Qarabağ” səfərdə yaxşı, rahat oynayır. Futbolçuları da çox təcrübəlidi, maşallah, Çempionlar Liqasında da zəngin təcrübələri var.

- Oyunla bağlı təxmininiz nəcədi? Nəticə baxımından hansı amil həlledici ola bilər?
- Əlbəttə, hamı istəyir ki, müsbət, yaxşı nəticə olsun. Buna baxmayaraq, “Qarabağ”ın bura qədər gəlməsi özü qələbədi də. İştah dişin altındadı. Yedikcə yemək istəyirsən. “Qarabağ” Avropada özünü sübut etmiş klubdu.

- Proqnoz verin, proqnoz...
- “Liverpul” indi yaxşı dönəm yaşamır. İnanıram ki, heç-heçə olar.

MÜZƏFFƏR QULUZADƏ