Yanvarın 3-ü səhər saatlarında dünyada heç vaxt unudulmayacaq bir hadisə baş verdi. Belə ki, Amerika Birləşmiş Ştatlarının Silahlı Qüvvələri Venenesuelaya hücum etdi, “Delta Force” xüsusi təyinatlıları birbaşa ABŞ prezidenti Donald Trampın göstərişi ilə Venesuela prezidenti Nikolas Maduronu və onun xanımı Siliya Floresi yataq otağından götürüb apardılar. Bəli-bəli, düz oxuduz, müstəqil bir dövlətin başçısı oğurlandı, artıq ona narkocinayətkarlıqla bağlı ittiham da irəli sürülüb. Bu hadisə dünyanın hər yerində adamları ikiyə böldü. Maduro ilə xanımını yataq otağından götürdən Trampa haqq qazandıranlar da var, onu lənətləyənlər də. Azərbaycan futbol ictimaiyyətinin bəzi nümayəndələrinin bu olaya münasibətini öyrəndik.
Ruslan Əmircanov: “Qadan alım, “Futbol+”dən olduğunu deyib, mənə siyasi suallar verirsən. Mən nə bilim Venesuelanın prezidenti həyat yoldaşı ilə hardadı, neynir. Mənə de ki, top necə gedəcək, futbolu kim oynayacaq? Maraqlı suallar verirsən e... Mənim başımı siyasi söhbətlərə qatma. Futboldan danış e... Nə fikir bildirim? Kimi axtaraq? Venesuelanın prezidentini hardan tapaq? Gülməli, maraqlı suallar verirsən e, qardaşım”.
Kənan Məstəliyev: “Maduro məsələsi əslində prezident İlham Əliyevin təəssüflə təkrarladığı ifadəni bir daha sübut etdi. Beynəlxalq hüquqa inam qalmayıb. Bu ancaq kağız üzərindədi. BMT də qüvvəsini itirib. Kim güclüdüsə, o da qalib gəlir. 44 günlük müharibə dövründə haqlı savaşımızda gördüklərimiz hər gün təsdiqini tapır. Bunlar qeyri-demokratik addımlardı. Zirvə nöqtəsi də Trampın administrasiyasının atdığı addımdı. Bir dövlətin başqa dövlətin rəsmi prezidentini oğurlamasının heç bir hüquqi, demokratik əsası yoxdu. BMT-nin Təhlükəsizlik Şürası toplanmalı, müvafiq qərar verməli, legitimlik şübhə altına salınmalı, bununla bağlı BMT-nin sanksiyası tədbiq olunmalı idi. Bu halda qəbul etmək olardı. Bir prezidentin başqa ölkənin prezidentini bu şəkildə götürüb aparmasının heç bir hüquqi əsası yoxdu, çox təhlükəlidi. Prezident İlham Əliyev illər əvvəl nə deyibsə, düzgün deyib. Sadəcə, güclü olmaq lazımdı, öz maraqlarımızı düşünməliyik və buna uyğun addım atmalıyıq”.
Yaşar Seyidov: “Mən bu məsələni lap əvvəldən izləmişəm. İş ondadı ki, ABŞ kimi sivil dövlət Venesuelaya bildirib ki, ölkəmizi narkotiklə zəhərləməyin. Narkomaniya ilə gənclərimizi məhv edirsiz, yollarını azıb, pis vərdişlərə qurşanırlar. Rəsmi şəkildə məktublar göndərilib, xəbərdarlıq edilib. Amma onlar bundan əl çəkməyib. İndi özünüz fikirləşin. Amerika kimi dövlətin rəhbəri nə etməli idi? Ölkəsini zəhərləyir. Buna görə də Trampın etdiyi hərəkət çox doğrudu. Sözlə başa düşməyənə belə etmək lazımdı. Vladimir Zelenski gözəl açıqlama verib ki, diktatorla necə davranmaq lazım olduğunu Tramp çox yaxşı bilir. Biz sağlamlığın, xoşbəxtliyin lehinəyik. Sözlə başa düşməyiblər deyə belə ediblər. Hətta Maduroya Türkiyədə sığınacaq təklif olunub, qəbul etməyib. O Trampa deyirdi ki, Karakasdayam, duxun çatırsa, gəl bura, götür. Onlar da gəldilər, götürdülər (gülür). Ölkəmizdə bununla bağlı ciddi qərarlar var. DİN əlindən gələni edir. Dövlət səviyyəsində işlər aparılır. Nail Kəmərlinin verilişlərinə baxıram. Göstərir ki, bu işin sonu budu. Narkotikdən uzaq olmaq lazımdı”.
MÜZƏFFƏR QULUZADƏ