Devid Bekhem ziyana düşüb. Onun villası bir ay əvvəl qarət edilib, amma media bundan yalnız bugünlərdə xəbər tuta bilib.

Maraqlıdı ki, hadisə İngiltərə millisinin sabiq oyunçusu və “İnter Mayami”nin həmsahibi ailəsi ilə birlikdə evdə olarkən baş verib. “The Sun” qəzetinin yaydığı xəbərdə qarətin fevralın 28-də Qərbi Londonda baş verdiyi bildirilib. Devid, həyat yoldaşı Viktoriya və 10 yaşlı qızı Harper birinci mərtəbədə istirahət edən zaman maskalı şəxs villanın ikinci mərtəbəsindəki yataq otaqlarından birinə daxil olub və bir neçə min funt sterlinq dəyərində qızıl-zinət əşyalarını, paltar və məişət texnikasını oğurlayıb. Oğurluq hadisəsindən evə gec qayıdan Bekhemin 17 yaşlı oğlu Kruz xəbərdar olub. O, otaqda hər şeyin alt-üst olduğunu və döşəmədəki şüşə qırıntılarını görüb.

“The Sun” qəzetinin yaydığı xəbərdə belə deyilir: “Təəssüf ki, Bekhemlər ərazidə fəaliyyət göstərən peşəkar oğrunun qurbanı oldular. Xoşbəxtlikdən cinayətkar qaçmazdan əvvəl yalnız bir yataq otağına girə bilib”.