“Barsa”nın ABŞ-dəki oyunu ləğv olundu - gerçək səbəb nədi?
La Liqa çərşənbə axşamı 17-ci turun “Vilyarreal” – “Barselona” oyununun dekabrın 20-də Mayamidə keçirilməsi ilə bağlı ideyadan əl çəkdiyini elan etdi. Belə çıxır ki, İspaniya çempionatının 9-cu turunda bununla bağlı qeydə alınan kütləvi etirazlar bəhrə verdi?
"Football-plus.az" xəbər verir ki, La Liqa oktyabrın 21-də içində izahatın yer aldığı rəsmi məktub yayıb. Həmin məktubdan belə aydın olur ki, oyun Amerika tərəfindən olan promouterlərin xahişi ilə ləğv olunub:
“La Liqa dərin təəssüf hissi ilə bildirir ki, İspaniya futbolunun beynəlmiləlləşməsi üçün tarixi və presedentsiz imkan yaradacaq bu layihə gerçəkləşməyəcək. Rəsmi oyunun ölkəmizin xaricində keçirilməsi turnirin qlobal inkişafı baxımından həlledici addım olacaq, klubların beynəlxaq populyarlığını, oyunçuların statusunu artıracaq, İspaniya futbolunu strateji cəhətdən vacib olan ABŞ bazarında önə çıxaracaqdı. Bu layihə milli federasiyanın reqlamentinə tam uyğun gəlirdi, turnirin vahidliyinə xələl gətirmirdi. Bunu səlahiyyətli orqanlar da təsdiqləmişdi. Etirazlar başqa şərtlərlə bağlıdı. Dünyadakı rəqabətin artdığı, İngiltərə premyer-liqasının və ya Çempionlar Liqasının nüfuz dairəsini, maliyyə əzəmətini yüksəltdiyi məqamda belə təşəbbüslər İspaniya futbolunun böyüməsi və dayanıqlılığın möhkəmlənməsi üçün hədsiz vacibdi. Bundan imtina yeni gəlir mənbələri yaratmağa mane olur, klubların investisiya qoymaq və rəqabət aparmaq imkanlarını məhdudlaşdırır, İspaniya futbolunun beynəlxalq potensialını aşağı salır”.
Bəs La Liqanın sonuncu – 9-cu turunda bu ideya ilə bağlı nələr yaşanıb? İlk növbədə onu vurğulayaq ki, La Liqanın rəhbərliyi, xüsusən də Xavyer Tebas bu oyunun ölkə xaricində təşkilini ikiəlli razı idi, bütün resursları işə salmaqla ABŞ-yə yollanmağı təbliğ edirdi, klublara təsir göstərməyə çalışırdı. Amma klublar qəti şəkildə bu ideyaya qarşı çıxırdılar və təbii ki, indi məmnundular. “Barselona”nın Vilyarreal əvəzinə Mayamiyə yollanması planı milli komandaların oyunları üçün yaranan fasilədə təsdiqlənib. Ondan dərhal sonra, yəni La Liqanın 9-cu turunda oyunların start fiti etirazlar üzündən gec səsləndi. Bütün komandaların kapitanları “vatsap”da ortaq çat açaraq bu etiraz aksiyasını razılaşdırıb. Onların arxasında Tebasın ideyaları ilə razılaşmayan Futbolçuların Həmkarlar İttifaqı dayanırdı: oyunçular ən azı bu mövzuda müzakirələrin, danışıqların təşkilini tələb edirdilər. Maraqlıdı ki, həmin çata bilərəkdən “Vilyarreal”la “Barselona”nın kapitanları dəvət olunmamışdı, yən maraqların toqquşması baş verməsin. Ancaq səs-küy dalğası "Barsa"nı da əhatə etdi: bu komandanın “Jirona” ilə oyununun ilk 15 saniyəsində “həyat dondu”. Canlı yayının rejissorları isə bu mənzərəni iqnor etdilər, hər dəfə stadionu helikopterdən çəkilən fərqli planda göstərdilər.Ümumi narazılığı ifadə edən başqa addımlar da oldu. Məsələn, “Real”ın müdafiəçisi Dani Karvaxal ictimaiyyət önündə Tebasla münasibətləri aydınlaşdırmaq yolunu tutdu. “Kral klubu”nun kapitanının fikri:
“Oyunun Mayamidə keçirilməsi, sözsüz, yarışların nəticələrinin təhrif olunması deməkdi. Belə durum La Liqada çıxış edən bütün kıubların eyni şəraitdə yarışmasına imkan vermir”.
La Liqanın rəhbəri Xavyer Tebas belə sərt açıqlamanı cavabsız qoymadı:
“Fikrimcə, “Real”ın klub telekanalının ötən mövsüm boyunca yaydığı videoçarxlar yarışları hər şeydən çox saxtalaşdırır”. Karvaxal isə dialoqu sosial şəbəkə vasitəsi ilə davam etdirdi: “Salam, cənab Tebas. Reqlamentin pozulması turnir qaydalarının saxtalaşdırılmasıdı. “Real”ın kanalındakı videoçarxlarla bağlı çox söz deyə bilərsiz. Ancaq bu ideyanın qaydaları pozduğunu inkar edə bilməzsiz. Oyun Mayamidə keçirilsə, turnirin üzərinə ləkə düşəcək”.
“Barsa”nın prezidenti Xuan Laporta da mübahisəyə qoşulub:
“Real” istədiyini danışmaqda azaddı, mən isə “Barselona”nın rəhbəriyəm və biz dekabrın 20-də Mayamidə oynayacağıq”.
Hər halda, ABŞ-də oyun olmayacaq. “Marca”nın yaydığı xəbərə inansaq, La Liqa Amerikadan olan promouterlərlə durumu müzakirə edəndən sonra son qərarını verib. Mayamidə oyun keçirmək ideyasının ləğvinə son həftələrdə İspaniyada bununla bağlı yaşanan qeyri-müəyyənlik təkan verib.
Digər xəbərlər
