Özbəkistan da “Formula-1”ə maraq göstərir?
Özbəkistan hökuməti ölkədə “Formula-1” yarışının təşkilinə maraq göstərir. Bu barədə tanınmış jurnalist və “Formula-1” mütəxəssisi Co Seyvud sosial şəbəkə hesabında məlumat yayıb.
Onun iddiasına görə, Özbəkistan nümayəndəsi ötən həftə keçirilən Sinqapur mərhələsində paddok ərazisində görünüb və yarışın ölkədə keçirilməsi imkanlarını müzakirə edib.
Xatırladaq ki, hazırda Asiya qitəsində “Formula-1” mərhələlərinə evsahibliyi edən ölkələr arasında Bəhreyn, Çin, Yaponiya, Səudiyyə Ərəbistanı, Azərbaycan, Sinqapur, Qətər və Birləşmiş Ərəb Əmirlikləri var.
Yeri gəlmişkən, ikiqat dünya çempionu Mika Hakkinen 14 yaşlı qızı Ellanın yaxın bir neçə il ərzində “Formula-1”də iştirak potensialına malik olduğunu bildirib. Onun 11 yaşlı oğlu Daniel də pilot olmağa hazırlaşır:
“Ella və Daniel ciddi şəkildə məşq edirlər. Onlar hər gün on kilometr qaçır, uzanır, əzələlərini gücləndirir, pəhrizlərinə sadiq qalırlar. Hər aspekti yerinə yetirirlər. Deyə bilərəm ki, övladlarım “Formula-1”də Lüis Hemiltonla eyni səviyyədə məşq edirlər. Heç bir şey nəzarətsiz qalmır”.
Hakkinen əmindi ki, tezliklə “Formula-1” yarışlarında qadın sürücü peyda olacaq:
“Mənim buna inamım sarsılmazdı, 100 faiz əminəm. Qadın sürücülər 2030-cu ilə qədər ən yüksək səviyyəyə çatacaqlar - ya Ella, ya da başqa biri. Bəzi komandalar, şübhəsiz ki, nə vaxtsa pilot yeri üçün bir qız seçəcəklər”.
Digər xəbərlər
