Azərbaycan milli komandası İslandiya önündə darmadağın oldu. Futbolçularımız oyunboyu saysız-hesabsız səhvə yol verdi. Bəs Fernando Santuşun heyət seçimi necə idi?

Qapıçı seçimi ilə bağlı çox söhbət gəzdi. Amma igidi öldür, haqqını yemə. Nə qədər acı səslənsə də, qapıçı Şahruddin Məhəmmədəliyev komandanın ən yaxşılarından idi. Ona görə də bu seçim haqda nəsə deməyimiz düzgün olmaz.

“Kim müdafiənin sağ cinahında oynasın” sualının cavabında oyundan əvvəl, yəqin ki, Abbas özü də özünü deməzdi. Ümumiyyətlə, onun çağrılması səhv idi. Bəlkə də Santuş Bədavi ilə Abbası səhv salmışdı. İdeal formada olan Qismət Alıyevi meydana buraxanda artıq gec idi - dördüncü qol buraxılmışdı.

Dayaq yarımmüdafiəçiləri seçimi də bərbad idi. İki bəstəboyu - İsmayıl İbrahimli ilə Səbuhi Abdullazadəni belə rəqibə qarşı oynatmaq absurdun zirvəsi idi. İsmayıl sanki ilk dəfə böyük futbol oynayırdı, həyəcandan topu ram edə bilmirdi. Hücum xətti haqda isə nəsə demək olmur - olanımız budu. Amma Emin artıq tükənir, fiziki cəhətdən tükənir. Kapitanlığı da qayıtdı, özü qayıtmadı. Mahir Emrelinin də nəsə demək haqqı yoxdu. Beş ildi Avropada oynayır, yığmaya 5 qəpiklik xeyri yoxdu!

MÜZƏFFƏR QULUZADƏ