"Sabah" Konfrans Liqasının 3-cü təsnifat mərhələsinin cavab oyununda evdə "Levski"yə uduzdu - 0:2.

"Football-plus.az" xəbər verir ki, Masazır təmsilçisinin baş məşqçisi Valdas Dambrauskas oyunsonrası mətbuat konfransında jurnalistlərin suallarını cavabladı.

- Əvvəlcə "Levski"ni növbəti mərhələyə vəsiqə qazanmaları münasibətilə təbrik edirəm. Hazırda çox şey deyə bilmirəm. İki oyunda qol vura bilmirsənsə, növbəti mərhələyə keçməyə rəqib daha çox layiqdi. Azarkeşlərimizə təşəkkür edirəm. Çox gözəl atmosfer yaratmışdılar. Oyun haqda taktiki cəhətdən nəsə demək çox çətindi. Çox məyusuq. Amma bu cür pis hissləri unutmalı, sabahdan etibarən çempionat haqda fikirləşməliyik. İnkişaf etməliyik. Çalışmalıyıq ki, yenidən xəyallarımızı gerçəkləşdirək - avrokuboklara qatılaq və bu dəfə daha irəli gedək.

- Bu gün Sofiyadakı cəsarətli "Sabah"la müqayisədə qorxaq "Sabah" gördük. Səbəb nə idi?
- Oyunumuzu niyə qorxaq adlandırdığınızı bilmirəm. Sualınızı futbolçularıma qarşı hörmətsizlik kimi qəbul edirəm. Bəli, Sofiyada daha intizamlı oynadıq. Düzdü, heç-heçə mənim üçün yaxşı nəticə deyil. Ancaq səfərdə son saniyədə qol buraxdıq. İnkişaf etmək istəyiriksə, çox şeyi dəyişməliyik. Bugünkü oyunun birinci hissəsini təhlil edin. Görün ki, oyunçular xətlərarası əlaqələrdə necə effektiv idi. Bu gün başqa fərq də var idi. Rəqib risk etmirdi. Biz isə daha çox risk etməliydik. Birinci hissədəki yrganə səhvimiz qolla nəticələndi. Bundan sonra risk aldıq. Nəticədə ötürmələr qeyri-dəqiq oldu, boşluqlar tapmaqda çətinlik çəkdik.

- Sizcə, "Sabah"ın oyunu stadiona gələn azarkeşlərə hörmətsizlik deyildi? 
- İsanlara nəzarət etmək əlimizdə deyil. Futbolda hər şey nəticədən asılıdı. Qələbə qzansaq, bizə təşəkkür edəcəkdilər, stadionu tərk etməyəcəkdilər. Onları səbirli olmağa çağırıram. Təəssüf ki, tərəfdarlarımızı üzdük. Hesabı bərabərləşdirib, intriqanı bərpa edə bilərdi. Cəhdlərimiz fayda vermədi. Azarkeş mədəniyyətini yaratmaq bir günün işi deyil.

- Pavol Şafranko və Cessi Sekidikanın meydanı tərk etməsindən sonra hücumda effekttivlik azaldı. Bu fikirlə razısız? Uğursuz əvəzetmə olduğunu demək olar?
- Yanlış xatırlamıramsa, bu dəyişikliyi 70-ci dəqiqədən sonra etdik. Əlbəttə, hər addımımın arxasında xoş niyyət var. Bilirik ki, meydana sonradan daxil olan oyunçu daha fərah, daha güclü olur. İstəyirik ki, həmin futbolçu hadisələrin axarı üçün fayda versin. Sonradan oyuna qatılan futbolçu qol vursa, məni tərifləyəcəkdiz. Deyəcəkdiz ki, Dambrauskas oyunu oxudu. Təəssüf ki, bu gün taktikam düzgün çalışmadı. Kahim Parris və Anatoli Nuriyevə də şans verdim. Kreativ olmaq istəyirdik. Mərkəz müdafiəçisi vasitəsilə standart vəziyyətlərdən yararlanmaq istəyirdik. Bu da olmadı.

- Sizcə, "Sabah" vaxtında lazımi sayda, keyfiyyətli oyunçular transfer etmədiyi üçün hər iki oyunda uduzdu?
- Birinci hissədə rəqibin cəmi bir qapıyazərbəsi oldu. O da qolla nəticələndi. İkinci hissədə bizə qollar lazım idi. Rəqib müdafiə olunmağa başladı, boşluqları bağladı. Yenə də oyuna nəzarət edən tərəf biz idik. "Levski" əks-hücumlarda heç nə edə bilmirdi. Biz xeyli qol epizodundan yararlana bilmədik. Hər halda, "Levski"yə qarşı oynadıq. Onlar Bolqarıstanın ən güclü komandalarından biridi. Dəyərləri bizdən çoxdu. Bunu bilirsiz: Sofiyada da ən yaxşısını etməyə çalışdıq. Sadəcə, son 10 saniyə bizi yaxşı nəticədən uzaqlaşdırdı. Məğlubiyyət ikinci oyuna da təsir etdi. Oyunçularım əlindən gələni etdi. Bu gün həll yolu futbolçuları yola salmaq, başqalarını tapmaq deyil. Elə məşqçi deyiləm. Daha çox çalışmalı, daha ağıllı yollar tapmalıyıq. Yeni mövsümdə avrokuboklara vəsiqə qazanıb daha yaxşı nəticələr qazanmalıyıq.

- Premyer-liqada hədəf nədi?
- Məqsədimiz bütün oyunlarda qələbə qazanmaq olacaq.

KƏNAN BAHADIR