“Selye”nin baş məşqçisi “Sabah”ı bu yolla məğlub etmək istəyir... – saman altından su yeridəcək!
“Sabah”ın baş məşqçisi Valdas Dambrauskas mətbuat konfransı keçirdi. Mütəxəssis Avropa Liqasının 1-ci təsnifat mərhələsində evdə “Selye”yə qarşı keçiriləcək matça həsr edilən tədbirdə media nümayəndələrinin suallarını cavabladı. Litvalının toxunduğu əsas məqamlardan biri də Sloveniya təmsilçisi haqda yetərincə məlumat toplaya bilməmələri idi.
Əslində bu gün internet üzərindən istənilən klub haqda bilgi almaq asan olduğundan çalışdırıcının dediklərinə haqq qazandırmaya bilərdik. Lakin mövzuyla bağlı araşdırma aparandan sonra məlum oldu ki, Dambrauskası qınamağa dəyməz.
Hər halda, bu məsələ təkcə bizim yox, həm də Sloveniya mətbuatının gündəmindədi. Və “Nogomania” “qraflar”ın sərgilədiyi davranışı tənqid edib. Söhbət nəşrin aşağıdakı yazısından gedir:
“Selye”nin baş məşqçisi Albert Rieranı anlamaq olmur. Komanda Avropa Liqası kimi ciddi turnirdən əvvəl cəmi bir yoxlama matçı keçirdi. Həmin oyunda Serbiyanın “Çukariçki” komandasına uduzdu. Maraqlıdı ki, qarşılaşma nə canlı yayınlandı, nə də tribunalara azarkeş və media nümayəndələri buraxıldı. Klub matçın start heyətini belə ictimaiyyətdən gizlətdi. Mövsümlərarası fasilədə heyətinə 10 yeni futbolçu cəlb edən “Selye” haqda hazırda heç bir fikrimiz yoxdu”.
Xatırladaq ki, “Sabah” – “Selye” matçı bu gün saat 20.00-da “Bank Respublika Arena”da başlayacaq.KƏNAN BAHADIR
Digər xəbərlər
