Çelestini Moskvaya gəldi, Avropa coşdu - “ömrünün sonuna qədər orda qal, İsveçrəyə dönmə”
Fabio Çelestininin Rusiyaya gəlməsi Avropada inanılmaz reaksiya doğurub.
“Bazel”in sabiq baş məşqçisi ÇSKA-nın “sükanı arxasına” keçib və bu qərar həm jurnalistlər, həm də futbol azarkeşləri arasında geniş diskussiyalara yol açıb.
Bir neçə məşhur nəşr 49 yaşlı mütəxəssisi kəskin şəkildə tənqid edib.
"Football-plus.az" xəbər verir ki, “Tages-Anzeiger” qəzeti Çelestininin Rusiya klubunu seçməsini “mənəvi müflislik” kimi xarakterizə edib, “Neue Zurcher Zeitung” isə onun peşəkarlıq dəyərlərinə şübhə ilə yanaşıb, seçimini “etik cəhətdən birmənalı olmayan və şübhəli” təyini ilə oxuculara çatdırıb.
Avstriyanın gündəlik auditoriyası 3 milyon adam olan nəhəng “Kronen Zeitung” nəşri Rusiya klublarının avrokuboklarda iştirak etmədiyini xatırladıb:
“Çelestini “Bazel”lə Çempionlar Liqasının təsnifat mərhələsində oynamaq və ya daha səviyyəli çempionatlardan təklif gözləmək əvəzinə UEFA-nın saksiyası üzündən avrokuboklarda iştirakına qadağa qoyulan klubda çalışacaq”.
Çelestininin ÇSKA-nı seçməsinə onun 2024/25 mövsümündə İsveçrə çempionu etdiyi komandanın azarkeşləri daha sərt yanaşıb. Adı çəkilən mütəxəssisin “Bazel”in rənglərini xatırladan qırmızı-göy şərfdə çəkdirdiyi və sosial şəbəklərdə yer alan şəkil onları dəlilik həddinə çatdırıb. İş ondadı ki, İsveçrə komandasının azarkeşləri bir müddət əvvəl Fabioya minnətdarlıq əlaməti kimi oxşar şərf bağışlayıb. İndi isə onu, sadəcə, satqın sayırlar. Hətta Çelestinini İsveçrə vətəndaşlığından məhrum etməyə qədər irəliləyən radikal çağırışlar var, emosional müzakirə dayanmaq bilmir:
“Qəhrəmanlıqdan dibə!”
“Ömrünün sonuna qədər orda qal, İsveçrəyə dönmə”.
“O, mənim üçün öldü”.
“İndiyə qədər hörmət edirdim, indi isə zibilə döndü”.
Azarkeşlərin fikrincə, Fabio siyasi və ictimai kontekstə baxmayaraq, Rusiyada çalışmağa razılıq verməklə “mənəvi sərhədi keçib”.
Xatırladaq ki, ÇSKA iyunun 20-də isveçrəli mütəxəssisi baş məşqçi postuna gətirdiyini elan edib. Çelestini ilə müqavilə “2+1” sxemi üzrə imzalanıb. Onun köməkçiləri Manel Eksposito, Xavyer Noyya və Xose Blesa da məşqçi korpusunda yer alacaq. “Hərbçilər” iyunun 22-də Novoqorskdakı bazasında isveçrəlinin rəhbərliyi altında toplanışa başlayıb.
Fabio özü isə təyinatını belə dəyərləndirib:
“ÇSKA ilə müqavilə imzaladığıma görə çox xoşbəxtəm. Mən və korpusum üçün böyük çağırışdı, biz artıq yeni işin həyəcanı ilə yaşayırıq. Bu böyük klubun tarixini yazmaq üçün səbirsizlənirik”.
Çelestininin sonuncu klubu 2023-cü ilin oktyabrından bu il iyunun 13-nə qədər çalışdırdığı “Bazel” olub. Komanda son mövsümdə onun rəhbərliyi altında həm çempion olub, həm də ölkə kubokunu qazanıb.
Çelestini “sükan arxasına” keçənə qədər “Bazel” turnir cədvəlinin zirzəmisində qərarlaşmışdı.
Digər xəbərlər
