Bu gün “Sports.az Awards" layihəsi üzrə 2024-25 futbol mövsümünün qaliblərinin mükafatlandırılma mərasimi keçirilib.

"Mövsümün ən yaxşı azərbaycanlı baş məşqçisi" nominasiyasının qalibi Qurban Qurbanov olub.

"Football-plus.az" xəbər verir ki, "Qarabağ"ın baş məşqçisi mərasimdən sonra jurnalistlərin suallarını cavablayıb.

- “Qarabağ” üçün mövsümü necə dəyərləndirirsiz?
- Əvvəla, mükafata görə, təşəkkür edirəm. Bir neçə tur əvvəl çempionluğu rəsmiləşdirdik. Ölkə kubokunun finalındayıq. Çox razı qaldım. Çempionatın gedişatında bəzi problemlər oldu. Bu da gözləniləndi. Futbolçuların həmişə eyni performans göstərməsi mümkün deyil.

- Mahir Emrelini burda gördüyünüzü dediz. Bura gələrkən sizinlə görüşdümü?
- Bura nə zaman gəldiyini bilmirəm. “Qarabağ”ın bazasına gəlir. Yeri gələndə məşq də edir.

- Sizcə, o, bundesliqada oynamağa hazırdı?
- Mahir çoxdan daha yaxşı yerlərdə oynamağa hazırdı. Oyun qabiliyyəti, futbol anlayışı buna imkan verir. Özü böyük komandalarda oynamağı çox istəsə, alınacaq.

- “Qarabağ” Çempionlar Liqasında güclülər səbətində yer alıb. Şansları necə dəyərləndirirsiz?
- 2-ci mərhələdən başlamaq üstünlükdü. Bu o deməkdi ki, müəyyən səviyyəyə çatmışıq. Hər mövqe üçün oyunçu axtarışındayıq. Yaxşı mənada dəyişikliklər etmək istəyirik. Avropadan bura gəlmək istəyən futbolçuların sayı azdı. Çalışırıq ki, işimizi daim yaxşılaşdıraq. Həmişə olduğu kimi, maksimum nəticə ilə özümüzü göstərməyə çalışacağıq.

ƏSƏD SEYİDOV