“Kəpəz” Misli premyer-liqasının 36-cı turunda “Turan Tovuz” önündə darmadağın oldu - 4:0.

“Football-plus.az” qonaqların baş məşqçisi Azər Bağırovun oyunsonrası mətbuat konfransından hesabatı təqdim edir.

- Bir məşqçinin həyatında jurnalistin böyük əməyi var. Oyunun nəticəsi oyun başlamamış mənim üçün bəlli idi. “Turan Tovuz”u təbrik edirəm. Onların əziyyəti də yerdə qalmaz.

- Artıq hamıya məlumdu ki, “Kəpəz”in “sükanı arxasından” getdiz. Dünənki iclasda nə danışıldı?
- Bəzi məsələlərdə razılaşa bilmədik. Qarşılıqlı razılıq əsasında yolları ayırdıq. Yeni rəhbərlik tam başqa cür düşünür.

- Komandada kimin qalıb-qalmayacağına rəhbərlik, yoxsa baş məşqçi qərar verir?
- Hamınıza hörmətim böyükdü. Bu gün sonuncu dəfə “Kəpəz” barədə danışacam. Burda yaxşı dostlar tapdıq. Sabah kimlərin qərar verəcəyini bilmirəm. Düşünürəm ki, yaxşı şeylər olacaq.

- Bu oyunun nəticəsinin əvvəlcədən bəlli olduğunu dediz…
- Futbolçular baş məşqçinin komandada qalmayacağını artıq bilirdi. Ruh düşkünlüyü olur. Döyüşkənlik hesabına premyer-liqada qalmışıq.

- Bilərəkdən oynamamaq ehtimalı var idi?
- Ola bilməz. Mən burda elə futbolçu tanımıram. Ruh düşkünlüyü oldu. Futbolçular da hissiyyatlı insanlardı.

- Hansı məsələlərdə ortaq məxrəcə gələ bilmədiz?
- Bunu açıqlaya bilməyəcəm. “Kəpəz”dən xoş sözlər deyə bilərəm. Mənin burda haqqım var. Ailəmlə keçirə biləcəyim vaxtın çox hissəsini akademiyada futbolçularla keçirmişəm.

- Sizdən halallıq aldılarmı?
- Biz hər şeyə peşəkar tərəfdən yanaşdıq. Həyat davam edir. Zaman göstərəcək ki, kim hardadı? Həmişə demişəm ki, həyatda düz olmaq lazımdı.

- Bu proseslərin belə olacağı gözlənilirdi. Peşman deyilsiz?
- Həftələr əvvəl mən getsəydim, komanda premyer-liqada qalmayacaqdı. Gəncəyə böyük futbol yaraşır.

- Təxminən iki həftə əvvəl mediada xəbər yayılmışdı ki, Baqa məhz “Kəpəz”in “sükanı arxasına” gəlir. Bu məlumat gəlib sizə çatmışdı?
- Mediada belə məlumat var idi. Şərtlər məni qane etmədiyinə görə ayrılıram. Sabah Baqa və ya Rednik də gələ bilər. Əsas odu ki, “Kəpəz” böyük futbolda olsun.

ƏSƏD SEYİDOV