“Hypers Quba” “Şəfa”nın Qubaya köçmək istəyini xoş qarşılamadı
İcarə əsasında yararlandığı “ASK Arena”da qazonun keyfiyyətindən narazı qalan “Şəfa”nın bölgəni təmsil etmək, daha dəqiqi, Qubanı təmsil etmək niyyətində olduğu deyilir. 2-ci liqanın 25-ci turunda – “Şimal” ilə oyundan əvvəl azarkeşləri stadiona çağıran “Hypers Quba” isə “biletlər 10 manata deyil, pulsuzdu” yazıb. Bu da birbaşa “Şəfa”ya atmacadı.
Bu atmacanın “Şəfa”nın Qubaya köçmək istəyi ilə bağlı olub-olmadığını öyrənmək üçün “Hypers Quba”nın prezidenti Ayaz Abdullayevlə əlaqə saxladıq:
“Şəfa” əvvəlcə açıqlama verdi ki, İsmayıllıya köçmək istəyirik, sonra da dedilər ki, Bakıda 15 min yerlik stadion tikirik. Biz, sadəcə, şimal futboluna olan haqsızlıqğa ilk fürsətdəcə cavab vermişik. Bakıya gələn iki minə yaxın qusarlı azarkeşin haqqı yeyilmişdi. Bizim o postu paylaşmaqda məqsədimiz mövqeyimizi bildirmək idi. Qubaya gəlsələr, xoş gəlirlər. Şimalda peşəkar futbol klubları nə qədər çox olsa, o qədər yaxşıdı. Bizim öz yolumuz var, bu yoldan dönən deyilik”.
“Hypers Quba”nın prezidentindən “Şəfa” Qubaya köçəcəyi halda, stadionları necə “bölüşəcəklərini” də soruşduq:
“Yəqin bizə mane olmazlar. Bizim müqaviləmiz var. Onlar da hansısa müqavilə təklif edə bilərlər. “Şəfa” tərəfinin də öz yanaşması var. Bizə mane olmamaq şərti ilə heç kimə etiraz etmərəm. Gəlsinlər, oynasınlar”.
Yeri gəlmişkən, “Şəfa”dan da Qubaya köçmək ehtimalı ilə bağlı soruşduq. Paytaxt klubu belə xəbərləri təkzib edir...
MÜZƏFFƏR QULUZADƏ
