"Zirə" Misli premyer-liqasının evdə keçirilən 33-cü tueər matçında "Turan Tovuz"u məğlub etdi - 1:0.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavabladı.

- Çox stresli oyun idi. Hər iki tərəf qələbə qazanmaq istəyirdi. İlk dəqiqələrdən meydanda böyük aqressiya, intensiv futbol, gərgin mübarizə göründü. İkinci hissəyə daha fəal başladıq, rəqibi əks-hücumda yaxalayıb gözəl və baxımlı qol vurduq. Azlıqda qaldıqdan sonra meydanda tam başqa futbol izlədik. Bizə hesabı qorumaq qalırdı. Vacib qələbə qazanaraq ikinci yeri tutduq. Bu münasibətlə azarkeşlərimizi, futbolçularımızı, klub rəhbərliyini ürəkdən təbrik edirəm. İkincilik olduqca önəmli idi. Bu mövsüm bizim üçün daha çətin keçdi,rəqiblər bizə qarşı daha fərqli oynadı. Şükürlər olsun ki, bu yükün öhdəsindən gəldik. Bu bizi çox sevindirir. Mövsüm ərzində göstərdikləri əzmkarlıq və peşəkarlığa görə, futbolçularıma təşəkkür edirəm. Çox əziyyət çəkdik. Elə oyun oldu ki, futbolçumuzun burnu, almacıq sümüyü qırılırdı, çoxsaylı zədələr oldu. Çətinliklərə baxmayaraq, daim iradə və nəticəyə doğru irəliləyən kollektiv görürdüm. Allaha şükürlər olsun ki, istəyimizə nail olduq. "Qarabağ" kimi komandanın yer aldığı çempionatda ardıcıl iki il ikinci yeri tutmaq vacibdi. Çox ciddi rəqabət getdi. Qış fasiləsindən sonra sabit oynayan, nəticə qazanan komanda idik.

- Növbəti oyunlarda rotasiyalar görəcəyik?
- Mütləq. Avrokuboklara hazırlaşacağıq. Az oynayanlara şans verəcəyik, çox yorulanları dinləndirəcəyik. Rahatlıqla avrokubok planlarını quracağıq. Ya biz, ya da "Sabah" Avropa Liqasına gedəcək. hər iki komandaya uğurlar arzulayıram.

- İndiki məqamda əsas məsələ güclənmək yox, hazırkı heyəti qoruyub-saxlamaqdı?
- Heyətlə bağlı ciddi təhlükə yoxdu. Çünki əvvəlcədən işimizi görmüşük. Demək olar ki, bütün futbolçuların müqaviləsi var. Bəlkə 1-2 futbolçu daha ciddi təklif aldığı üçün ayrıla bilər. olar. Amma kollektivi qoruyub-saxlaya biləcəyik.

- "Qarabağ" ölkə kubokunun finalında "Sabah"ı məğlub etsə, "Zirə" Avropa Liqasına yollanacaq. Bunu istəyirsiz?
 - Hər zaman xeyirlisini istəmişəm. Hər klub Avropa Liqasında oynamaq istəyər. Çünki ən azından bir məğlubiyyət imkanın olur. Amma hansı turnirdə hansı rəqiblə qarşılaşmağın daha uyğun olacağını bilmirik.

- Avrokuboklarda məqsədiniz bəllidi?
- Rəhbərliklə bu barədə söhbət olmayıb. Bütün fikrimiz çempionata yönəlmişdi. Bundan sonra danışacağıq. Hər klub kimi, biz də mümkün qədər çox mərhələ keçmək istəyirik.