Bildiyiniz kimi, “Neftçi” ölkə kubokunun yarımfinalında mübarizəni dayandırmaqla avrokubok sevdası ilə vidalaşdı.

“Ağ-qaralar”ın baş məşqçisi Samir Abasov az qala hər mətbuat konfransında komandaya çətin dönəmdə gəldiyini, heyəti özünün formalaşdırmadığını söyləyir. Yaxşı, yay transferlərini anladıq, bəs qışda komandaya cəlb olunan futbolçular - Rinosuke Ohori, Elvin Camalov, Aleks Fernandes və Bassala Sambu nə ilə yadda qalıb?

Ohori indiyədək cəmi 11 oyunda (8-i çempionatda, 3-ü kubokda) meydanda olub. Yaponiyalı futbolçu 8 çempionat oyununda qol hesabını açmayıb, bir məhsuldar ötürmə verib.

Elvin Camalov yalnız bir dəfə - 27-ci turun “Səbail”lə matçında fərqlənməyi bacarıb. 13 dəfə meydana çıxıb, bunların 8-i premyer-liqaya təsadüf edib.

Bassala Sambu 9 oyunun (8-i çempionat, 1-i kubok) 3-də fərqlənməyi bacarıb. Ölkə kubokunun 1/4 finalının cavab görüşündə “Kəpəz”in qapısına yeganə qolu vurdu, ancaq elə həmin oyunda “qırmızı” almaqla cəzalı duruma düşdü.

Aleks Fernandes 11 oyunda (8-i çempionat, 3-ü kubok) meydanda olub, heç nə ilə yadda qalmayıb...

ƏSƏD SEYİDOV