Bu gün, saat 20.00-da ölkə kubokunun yarımfinal qarşılaşmasında “Sabah” “Neftçi”ni qəbul edəcək. İlk oyun “bayquşlar”ın 2:1 hesablı qələbəsi ilə başa çatıb.

“Bank Respublika Arena”da keçiriləcək oyunda kim sevinəcək? Mövsümdə heç-heçə “rekordu qıran” “Sabah”, yoxsa iki top üstün olduğu oyunu əldən verən “Neftçi”? Vəziyyətə nəzər salanda Masazır təmsilçisinin turu keçəcəyi daha inandırıcı görünür. Buna inanmağa vadar edən 5 səbəb:

1. İlk oyundakı qələbə
“Sabah” qələbə qazanmaqla yanaşı, daha yaxşı oyun göstərdi. Hətta bir aşkar penalti də verilmədi ki, bu qərara görə oyunun baş hakimi Əliyar Ağayev çempionatda ikioyunluq cəzalandırıldı.

2. Futbolçu keyfiyyəti
“Neftçi”nin nə Şafranko kimi bitiricisi, nə də Sekidika, Mikels kimi oyunu üzərinə götürə, onun taleyini həll edə biləcək yaradıcı futbolçusu var.

3. “Doğma divarlar” amili
Paytaxtın iki təmsilçisinin duelində bu amili qabartmaq bəlkə də yersizdi. Ancaq məhz bu stadionda “Sabah” azarkeşlərinin ağ və qara rənglərə könül verənlərlə müqayisədə dəfələrlə artıq olacağı heç kimdə şübhə doğurmur. Bəzi anlarda isə məhz azarkeş amili önə çıxır.

4. Statistika
Bu komandalar arasında keçirilən son 12 oyunda “ağ-qaralar”ın yalnız bir qələbəsi var. O qələbənin də üzərindən artıq iki il keçib.

5. Baş məşqçi
Əlbəttə, Vasili Berezutski Samir Abasovdan təcrübəli deyil. Sadəcə, “Sabah”ın düşərgəsində hər kəs bu oyunun rusiyalı mütəxəssis üçün sonuncu ola biləcəyi anlayır. Samir bəyi isə istefa təhlükəsi gözləmir. Dediyinə görə, “Neftçi” rəhbərliyi onu komandaya uzunmüddətli planlar üçün gətirib.

Bir sözlə, bütün oxlar “Sabah”ı finala aparır. “Neftçi”nin belə oyun, belə heyət ilə finala çıxması möcüzə kimi görünür. Yeri gəlmişkən, "Neftçi"nin futbolçuları Rafael Quzzo, Emil Səfərov, Robert Bauer və Ryonosuke Ohori zədə, Bassala Sambu isə cəza səbəbindən bu görüşü buraxacaqlar.

MÜZƏFFƏR QULUZADƏ